തൃപ്പൂണിത്തുറ: അത്തച്ചമയത്തിന് രാജനഗരി അണിഞ്ഞൊരുങ്ങി. ചമയക്കാഴ്ചകളൊരുക്കി അത്തംഘോഷയാത്ര ഞായറാഴ്ച നടക്കും. സ്‌നേഹത്തിന്റെയും സാഹോദര്യത്തിന്റെയും വര്‍ണ വിസ്മയങ്ങളുമായി തിരുവോണ പുലരിയെ വരവേല്‍ക്കുന്നത് തൃപ്പൂണിത്തുറയില്‍ നടക്കുന്ന അത്തം ഘോഷയാത്രയോടെയാണ്.
ഞായറാഴ്ച രാവിലെ ഒമ്പതിന് മുഖ്യമന്ത്രി പിണറായി വിജയന്‍ അത്താഘോഷം ഉദ്ഘാടനം ചെയ്യും. എം സ്വരാജ് എം.എല്‍.എ അധ്യക്ഷത വഹിക്കും. കെ.വി തോമസ് എം.പി, അനൂപ് ജേക്കബ് എം.എല്‍.എ, നഗരസഭ ചെയര്‍പേഴ്‌സണ്‍ ചന്ദ്രികാദേവി, ജനറല്‍ കണ്‍വീനര്‍ വി.ആര്‍ വിജയകുമാര്‍ തുടങ്ങിയവര്‍ പ്രസംഗിക്കും. ഉദ്ഘാടന സമ്മേളനത്തെ തുടര്‍ന്ന് നഗരം ചുറ്റി വര്‍ണാഭമായ അത്തംഘോഷയാത്ര ആരംഭിക്കും.
സിയോന്‍ ഓഡിറ്റോറിയത്തില്‍ രാവിലെ പത്തിന് പൂക്കള മത്സരവും വൈകിട്ട് മൂന്ന് മുതല്‍ പൂക്കള പ്രദര്‍ശനവും നടക്കും. വൈകിട്ട് 5.30ന് ലായം കൂത്തമ്പലത്തില്‍ കലാസന്ധ്യ ഉദ്ഘാടനം, നാടന്‍പാട്ടും ദൃശ്യാവതരണവും. തിങ്കളാഴ്ച വൈകിട്ട് 5.30ന് വസന്ത ഗീതങ്ങള്‍, 6.30ന് വോഡാഫോണ്‍ കോമഡി താരങ്ങളുടെ കോമഡി ഷോ, ചൊവ്വാഴ്ച വൈകിട്ട് ആറിന് ഡാന്‍സ് ഇവന്റ്, ഏഴിന് മ്യൂസിക്കല്‍ പ്രോഗ്രാം പി.ബി ജങ്ഷന്‍, ബുധനാഴ്ച വൈകിട്ട് അഞ്ചിന് കലാസാഹിത്യ സാംസ്‌കാരിക വേദികളിലെ പ്രമുഖ വ്യക്തികളെ ആദരിക്കല്‍, 6.30ന് മജീഷ്യന്‍ കെ.എന്‍ കുട്ടിയുടെ മാജിക് വേള്‍ഡ്, ഏഴിന് വിഭിന്നശേഷിയുള്ള കുട്ടികള്‍ അവതരിപ്പിക്കുന്ന സ്പര്‍ശന്‍ മെലഡീസ്, വ്യാഴാഴ്ച വൈകിട്ട് 5.30ന് നങ്ങ്യാര്‍കൂത്ത്, ഏഴിന് വില്ലടിച്ചാംപാട്ട്, വെള്ളിയാഴ്ച വൈകിട്ട് ആറിന് ഇടയ്ക്ക നാദലയം, ഏഴിന് നൃത്ത സംഗീതനിശ. ശനിയാഴ്ച വൈകിട്ട് 5.30ന് ചാക്യാര്‍കൂത്ത്, 6.30ന് ഗാനമേള മിഡില്‍ ഈസ് ദഗോള്‍ഡ്. ഞായറാഴ്ച വൈകിട്ട് 5.30ന് തിരുവാതിരകളി, ആറിന് തിരുവാങ്കുളം ആദര്‍ശിലെ കുട്ടികളുടെ കലാപരിപാടികള്‍, ഏഴിന് നഗരസഭാംഗങ്ങളുടെ സംഘഗാനം, 7.30ന് ദുര്യോധന വധം കഥകളി എന്നിവയാണ് പരാപിടകള്‍. 13ന് അത്തപതാകയുടെ തൃക്കാക്കര പ്രയാണം.
ഇത്തവണ അത്താഘോഷം ഞായറാഴ്ചയായതിനാല്‍ വന്‍ ജനാവലി അത്തംഘോഷയാത്ര കാണാന്‍ നഗരത്തിലെത്തും.
ഘോഷയാത്രയെ ജനങ്ങള്‍ ഞെക്കി ഞെരുക്കി കടന്നുപോകാതിരിക്കാന്‍ ബാരിക്കേഡ് സ്ഥാപിക്കുന്നുണ്ട്. കൂടാതെ ധാരാളം പൊലിസുകാരെയും വിന്യസിക്കുമെന്ന് അത്താഘോഷ കമ്മിറ്റി ഭാരവാഹികള്‍ അറിയിച്ചു.