ദുബൈ: സന്ദർശകർ കാത്തിരുന്ന മിഡിൽ ഈസ്റ്റിലെ ഏറ്റവും വലിയ കുടുംബ, വിനോദ കേന്ദ്രമായ ഗ്ലോബൽ വില്ലേജിന്റെ വാതിലുകൾ ഈ മാസം16ന് തുറക്കും. താമസക്കാർക്കും വിനോദ സഞ്ചാര അതിഥികൾക്കും 29ആമത് സീണണിൽ കൂടുതൽ ഹൃദയസ്പർശിയായ അനുഭവങ്ങളാണ് സമ്മാനിക്കുകയെന്ന് അധികൃതർ അറിയിച്ചു. 

ഗ്ലോബൽ വില്ലേജിലേക്കുള്ള ടിക്കറ്റിന് കഴിഞ്ഞ വർഷത്തെ അപേക്ഷിച്ച് വർധനയുണ്ട്. മുൻ സീസണിൽ സാധാരണ ദിവസങ്ങളിലെ ടിക്കറ്റ് 22.50 ദിർഹമിന് ഓൺലൈനിൽ ലഭ്യമായിരുന്നു. കൂടാതെ, ഏത് ദിവസത്തെ പാസുകൾക്കും 27 ദിർഹമിന് ബുക്കിങ് നടത്താമായിരുന്നു. 
എന്നാൽ, ഇപ്പോൾ സാധാരണ ദിവസത്തെ ടിക്കറ്റിന് (ഞായർ മുതൽ വ്യാഴം വരെ, പൊതു അവധി ദിനങ്ങൾ ഒഴികെ) 25 ദിർഹമാണ് നിരക്ക്. ഏത് ദിവസത്തേയ്ക്കുമുള്ള ടിക്കറ്റിന് 30 ദിർഹമുമാണ് നിരക്ക്. 

3 വയസും അതിൽ താഴെയും പ്രായമുള്ള കുട്ടികൾക്കും 65 വയസ്സിനു മുകളിലുള്ള മുതിർന്നവർക്കും നിശ്ചയ ദാർഢ്യ(ഭിന്നശേഷി)ക്കാർക്കും പ്രവേശനം സൗജന്യമാണ്.  പുതിയ ലിമിറ്റഡ് എഡിഷൻ വി.ഐ.പി ടിക്കറ്റ് പാക്കേജുകൾ സെപ്റ്റംബർ 24 മുതൽ പ്രീ-ബുക്കിങ്ങ്നായി തുറന്നിരുന്നു. 

ഈ വർഷത്തെ പായ്ക്കുകൾ ഇപ്രകാരമാണ്: 4,745 ദിർഹം വിലയുള്ള മെഗാ ഗോൾഡ് പായ്ക്ക്: ഗ്ലോബൽ വില്ലേജ് ഗോൾഡ് വി.ഐ.പി പായ്ക്ക്   ദുബൈ പാർക്ക്‌സ് ആൻഡ് റിസോർട്ട്‌സ് അൾട്ടിമേറ്റ് പ്ലാറ്റിനം പ്ലസ് വാർഷിക പാസ്. 3,245 വിലയുള്ള മെഗാ സിൽവർ പായ്ക്ക്: ഗ്ലോബൽ വില്ലേജ് സിൽവർ വി.ഐ.പി പായ്ക്ക്   ദുബൈ പാർക്സ് ആൻഡ് റിസോർട്സ് അൾട്ടിമേറ്റ് പ്ലാറ്റിനം വാർഷിക പാസ്. ഈ പായ്ക്കുകൾ ഡി.പി.ആറിലേക്ക് അൾട്ടിമേറ്റ് പ്ലാറ്റിനം വാർഷിക പാസും നൽകുന്നു.

ഇത് ഉടമകൾക്ക് എല്ലാ പാർക്കുകളിലേക്കും ഗ്രീൻ പ്ലാൻ്റിലേക്കും പരിധികളില്ലാതെ പ്രവേശിക്കാൻ അനുമതി നൽകുന്നു. കൂടാതെ, ലാപിറ്റ ഹോട്ടൽ, ലെഗോ ലാൻഡ് ഹോട്ടലിൽ 20 ശതമാനം കിഴിവും ലഭിക്കും. ക്ലാസിക് വി.ഐ.പി പായ്ക്കുകൾ 7,350 ദിർഹമിന് വാങ്ങാൻ ലഭ്യമായ ഡയമണ്ട് വി.ഐ.പി പായ്ക്കിനൊപ്പം തിരിച്ചെത്തിയിരിക്കുന്നു. പ്ലാറ്റിനം പായ്ക്ക് 3,100 ദിർഹമിന് വിൽപ്പനയ്‌ക്കുണ്ടായിരുന്നു. ഗോൾഡ് പാക്കിന് 2,350 ദിർഹമും സിൽവർ പാക്കിന് 1,750 ദിർഹമുമാണ് വില. 

ഉദ്ഘാടന ദിവസമായ ഒക്ടോബർ 16ന് ഗ്ലോബൽ വില്ലേജ് വൈകിട്ട് 6 മുതൽ പുലർച്ചെ 12 വരെ തുറന്നിരിക്കും. ആദ്യ ദിവസം ഒഴികെ, ഞായറാഴ്ച മുതൽ ബുധൻ വരെയുള്ള ദിവസങ്ങളിൽ ഗ്ലോബൽ വില്ലേജിൻ്റെ പതിവ് സമയം വൈകിട്ട് 4 മുതൽ 12 മണി വരെയാണ്. വ്യാഴം, വെള്ളി, ശനി, പൊതു അവധി ദിവസങ്ങളിൽ പുലർച്ചെ 1 മണി വരെ തുറന്നിരിക്കും.ഈ വർഷം, ഗ്ലോബൽ വില്ലേജ് പുതിയ ആകർഷണങ്ങളും പുതിയ ആശയങ്ങളുമായാണ് എത്തുന്നത്. റെയിൽവേ മാർക്കറ്റ്, ഫ്ലോട്ടിങ് മാർക്കറ്റ്, ഫിയസ്റ്റ സ്ട്രീറ്റ് എന്നിവയിൽ പുതിയ കൂട്ടിച്ചേർക്കലുകളുണ്ടാകും. കുടുംബങ്ങൾക്കും സുഹൃത്തുക്കൾക്കും അധിക ഇരിപ്പിടങ്ങളോടു കൂടിയ പുതിയ ഗ്രീൻ പ്രൊമെനേഡുകളുണ്ടാകും. 

ഒരു റസ്റ്ററൻ്റ് പ്ലാസയും മൂന്ന് പുതിയ സാംസ്കാരിക പവലിയനുകളും അവതരിപ്പിക്കും. പവലിയനുകളുടെ എണ്ണം 30 ആയി ഉയർത്തുന്നതാണ്. ഈ സീസണിൽ 3,500 ഷോപ്പിങ് സ്ഥാപനങ്ങളുമുണ്ടാകും. ഭക്ഷണ പ്രിയർക്കായി കാർണവൽ ഫൺ-ഫെയർ ഏരിയയ്ക്ക് പുറമെ പുതിയ റസ്റ്ററൻ്റ് പ്ലാസയിലുടനീളം 250ലധികം വൈവിധ്യമാർന്ന ആഗോള പാചക രീതികൾ പരീക്ഷിക്കപ്പെടും. ഫിയസ്റ്റ സ്ട്രീറ്റിലെ ഇരട്ട നിലകളുള്ള സ്ട്രീറ്റ് കിയോസ്‌കുകൾ, ഡ്രാഗൺ തടാകത്തിന് സമീപമുള്ള പ്രീമിയർ ഡൈനിംഗ്, റെയിൽവേ മാർക്കറ്റ്, ഫ്ലോട്ടിംഗ് മാർക്കറ്റ് എന്നിവിടങ്ങളിൽ പരമ്പരാഗത ഭക്ഷണം ആസ്വദിക്കാം. 

സാഹസികർക്കായി പുതിയ റൈഡുകളും ഗെയിമുകളും ഉണ്ടാകും. അത്തരം വിനോദ ആകർഷണങ്ങളുടെ എണ്ണം 200ലധികം വരും. സാഹസിക അനുഭവങ്ങൾ, സ്പേസ് എക്സ്സ്‌പ്ലൊറേഷൻ തുടങ്ങിയവ അത്ഭുത സ്തബ്ധമാക്കുന്നതായിരിക്കും. പ്രധാന സ്റ്റേജിലും കിഡ്‌സ് തിയേറ്ററിലും ഗ്ലോബൽ വില്ലേജിലെ തെരുവുകളിലുടനീളവും 40,000ത്തിലധികം വിനോദ പരിപാടികളും പ്രകടനങ്ങളും സഹിതം ഒരു പുതിയ സ്റ്റണ്ട് ഷോയും ഇക്കുറിയുണ്ടാകുന്നതാണ്.