അരീക്കോട്: മൂര്‍ക്കനാട് സുബലുസ്സലാം ഹയര്‍ സെക്കന്‍ഡറി സ്‌കൂളില്‍ സഹപാഠികള്‍ക്കൊരു കൈത്താങ്ങായി ഗ്രേസ് ഡ്രോപ്‌സ് പദ്ധതിക്ക് തുടക്കം. വിദ്യാര്‍ഥികളും അധ്യാപകരും ചേര്‍ന്ന് സ്‌കൂളിലെ അവശതയനുഭവിക്കുന്ന വിദ്യാര്‍ഥികളെ സഹായിക്കുകയാണു പലിശ രഹിത ഗ്രേസ് ഡ്രോപ്‌സ് പദ്ധതിയുടെ ലക്ഷ്യം.
സ്‌കൂളിലെ എന്‍.എസ്.എസ് യൂനിറ്റിനു കീഴിലാണു പദ്ധതി നടപ്പാക്കാന്‍ ഉദ്ദേശിക്കുന്നത്. എന്‍.എസ്.എസ് വളണ്ടിയര്‍മാര്‍ പിറന്നാള്‍ ആഘോഷം വേണ്ടെന്ന് വച്ചും മിഠായി ശീലം എടുത്ത് കളഞ്ഞുമാണ് പദ്ധതിയിലേക്ക് പണം കണ്ടെത്തുന്നത്. പ്രയാസമനുഭവിക്കുന്ന സഹപാഠികളെ സഹായിക്കുന്നതിലൂടെ തങ്ങളുടെ സ്‌നേഹപ്രകാശം സമൂഹത്തിലെത്തിക്കാനുള്ള തയാറെടുപ്പിലാണു എന്‍.എസ്.എസ് വളണ്ടിയര്‍മാര്‍. സ്‌കൂളില്‍ ഒരുക്കിയ പ്രത്യേക ചടങ്ങില്‍ ഒന്നാം വര്‍ഷ വളണ്ടിയറായ അര്‍ച്ചന എന്‍.എസ്.എസ് വളണ്ടിയര്‍ സെക്രട്ടറി റാഹിലക്ക് ആദ്യ തുക നല്‍കി പദ്ധതിയുടെ ഉദ്ഘാടനം നടത്തി.
എന്‍.എസ്.എസ് വളണ്ടിയര്‍മാരായ ജല്‍വാ ഖദീജ, മുഹമ്മദ് അല്‍ത്താഫ്, സ്‌നേഹ, പ്രോഗ്രാം ഓഫിസര്‍ എം കൃഷ്ണനുണ്ണി എന്നിവര്‍ നേതൃത്വം നല്‍കി. പ്രിന്‍സിപ്പല്‍ കെ അബ്ദുറസാഖ്, പി.ടി.എ പ്രസിഡന്റ് ടി സൈതലവി, അഹമ്മദ് സവാദ്, അബ്ദുറഹൂഫ്, ശാലിനി, സ്വപ്ന എന്നിവര്‍ സംബന്ധിച്ചു.