കണ്ണൂര്‍: ജില്ലാ പഞ്ചായത്തിന്റെ വികസന കേന്ദ്രത്തില്‍ ജൈവ പച്ചക്കറി വില്‍പനയ്ക്കും മത്സ്യത്തിനും സ്ഥിരം സംവിധാനമായി അക്വാഗ്രീന്‍ എന്നപേരില്‍ വില്‍പന സ്റ്റാള്‍ ആരംഭിക്കും. ആറിനു സ്റ്റാള്‍ തുറന്നു നല്‍കും. ജില്ലാ പഞ്ചായത്ത് പ്രൊജക്ട് പ്രകാരം കൃഷി സംഘങ്ങളില്‍ നിന്നുള്ള വിഷരഹിത  പച്ചക്കറിയാണ് അക്വാഗ്രീന്‍ സ്റ്റാളില്‍ വില്‍പന നടത്തുക. കൃഷി ഓഫിസര്‍മാര്‍ വിഷരഹിതമെന്ന് സര്‍ട്ടിഫിക്കറ്റ് നല്‍കിയാല്‍ മാത്രമേ സ്റ്റാളിലേക്ക് പച്ചക്കറി സ്വീകരിക്കൂ. കൃഷി വകുപ്പിന്റെ മേല്‍നോട്ടത്തിലായിരിക്കും ഇതിന്റെ പ്രവര്‍ത്തനം. മത്സ്യ സഹകരണ സംഘങ്ങളിലൂടെ വൃത്തിയാക്കിയ മത്സ്യം വില്‍പന നടത്താനുള്ള ഫിഷ് മാര്‍ട്ടും സ്റ്റാളില്‍ ക്രമീകരിക്കും. ഫോണ്‍ വഴി ആവശ്യക്കാര്‍ക്ക് മത്സ്യം എത്തിക്കുന്നതിനും ആലോചനയുണ്ട്. വാര്‍ത്താസമ്മേളനത്തില്‍ ജില്ലാ പഞ്ചായത്ത് പ്രസിഡന്റ് കെ.വി സുമേഷ്, വി.കെ സുരേഷ് ബാബു, കെ.പി ജയബാലന്‍, കെ ശോഭ, ടി.ടി റംല, എം.കെ ശ്രീജിത്ത്, സുജാത, രജിത പങ്കെടുത്തു.