കൊച്ചി: ഇന്നലെ മഹാരാജാസ് ഗ്രൗണ്ടിൽ നടന്ന സീനിയർ ആൺകുട്ടികളുടെ ഹാമർത്രോയിൽ സ്വർണം ആർക്കെന്നറിയാൻ കോടതി വിധിവരണം. മത്സരത്തിൽ ഒന്നാമതെത്തിയ പാലക്കാട് ബി.ഇ.എം.എച്ച്.എസ്.എസിലെ പ്ലസ്ടു വിദ്യാർഥിയായ വി.വി രോഹിത് ചന്ദ്രൻ കോടതിയുടെ നിർദേശപ്രകാരമാണ് മത്സരിച്ചത്. പാലക്കാട് ജില്ലയിൽ നടന്ന ഹാമറിൽ മൂന്ന് തവണയും ഫൗളായതിനെ തുടർന്ന് രോഹിത്തിനെ അയോഗ്യേനാക്കുകയായിരുന്നു. ഇത് ചോദ്യം ചെയ്താണ് രോഹിത് കോടതിയെ സമീപിച്ചത്.

കോൺക്രീറ്റ് ചെയ്യേണ്ട സ്ഥലത്തിന് പകരം മണ്ണിട്ട സ്ഥലത്താണ് മത്സരം നടത്തിയതെന്നും കഴിഞ്ഞ വർഷം സംസ്ഥാനതലത്തിൽ വെള്ളിയും ദേശീയതലത്തിൽ ആറാം സ്ഥാനവും നേടിയതിന്റെ സർട്ടിഫിക്കറ്റുകളും കാണിച്ചതോടെ രോഹിത്തിന് കോടതി മത്സരിക്കാൻ അനുമതി നൽകി. എന്നാൽ മെഡൽ ഉൾപ്പെടെയുള്ള കാര്യങ്ങൾ നൽകുന്നത് അന്തിമവിധിക്ക് ശേഷമായിരിക്കണമെന്നും കോടതി അറിയിച്ചു.
ഉത്തരവ് വന്നതിനെ തുടർന്ന് മത്സരത്തിനിറങ്ങിയ രോഹിത് 57.97 മീറ്റർ എറിഞ്ഞ് ഒന്നാമതെത്തി.

കേസ് നടക്കുന്നതിനാൽ ഒന്നാം സ്ഥാനക്കാരനെ പ്രഖ്യാപിക്കാൻ സാധിച്ചില്ല. വിധി അനുകൂലമായാൽ രോഹിതിന് സ്വർണം ലഭിക്കും. അല്ലാത്തപക്ഷം രണ്ടാമനായി ഫിനിഷ് ചെയ്ത എറണാകുളം കീരംപാറ സെന്റ് സ്റ്റീഫൻ എച്ച്.എസ്.എസിലെ ജോൺസ് ഡൊമനിക് വിജയിയാകും. പരീശീലനത്തിനിടെ നടുവിന് ക്ഷതമേറ്റതിനെ തുടർന്ന് രണ്ടാഴ്ച്ചയായി പൂർണ വിശ്രമത്തിലായിരുന്ന രോഹിത് മത്സര ദിവസമായ ഇന്നലെയാണ് ഹാമർ കൈയിലെടുക്കുന്നത്.

തനിക്ക് മത്സരിക്കാൻ അനുമതി നൽകിയ കോടതി തന്നെ വിജയിയായി പ്രഖ്യാപിക്കുമെന്ന പ്രതീക്ഷയിലാണ് താരം. പാലക്കാട് ഒളിംപിക് അത്‌ലറ്റിക് ക്ലബ്ബിൽ അശ്വിൻ ഹരിദാസിന്റെ കീഴിലാണ് രോഹിത് പരിശീലിക്കുന്നത്. പൊലിസ് ഉദ്യോഗസ്ഥനായ കെ.സി വിനുവിന്റെയും അധ്യാപികയായ വി.എസ് ശിൽപ്പയുടെയും മകനാണ്.