തെല്‍ അവീവ്: യുദ്ധത്തിന് ശേഷം ഹമാസ് ഗസ്സ ഭരിക്കില്ലെന്ന് ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹു. ഗസ്സയില്‍ സന്ദര്‍ശനം നടത്തിയ ശേഷമാണ് ഇസ്‌റാഈല്‍ പ്രധാനമന്ത്രിയുടെ പ്രതികരണം.  വെടിനിര്‍ത്തല്‍ കരാറുണ്ടാക്കാനുള്ള ശ്രമങ്ങളെ ഒരിക്കല്‍ കൂടി നെതന്യാഹു നിരാകരിച്ചു.

ഇസ്‌റാഈല്‍ ബന്ദികളെ തിരിച്ചെത്തിക്കുന്ന ഗസ്സക്കാര്‍ക്ക് വന്‍ പാരിതോഷികം നല്‍കുമെന്ന പ്രഖ്യാപനം നെതന്യാഹു ആവര്‍ത്തിച്ചു. ഒരു ബന്ദിയെ തിരിച്ചെത്തിക്കുന്നവര്‍ക്ക് അഞ്ച് മില്യണ്‍ ഡോളറാണ് ഇസ്‌റാഈല്‍ പ്രധാനമന്ത്രി വാഗ്ദാനം ചെയ്തിരിക്കുന്നത്. ബന്ദി മോചനത്തിനായി എത്ര മില്യണ്‍ ഡോളര്‍ വേണമെങ്കിലും ചെലവഴിക്കാന്‍ ഇസ്‌റാഈല്‍ തയ്യാറാണെന്നായിരുന്നു നേരത്തെ പറഞ്ഞിരുന്നത്. 

വടക്കന്‍ ഗസ്സയില്‍ ഇസ്‌റാഈല്‍ ആക്രമണം ശക്തമായി തുടരുന്നതിനിടെയാണ് നെതന്യാഹുവിന്റെ സന്ദര്‍ശനം.

നെതന്യാഹുവിന്റെ സന്ദര്‍ശനത്തിന്റെ വിഡിയോ പുറത്ത് വന്നിട്ടുണ്ട്. ഇസ്‌റാഈല്‍ പ്രതിരോധസേന ഗസ്സയില്‍മികച്ച നേട്ടമുണ്ടാക്കി. ഹമാസ് വീണ്ടും ഗസ്സയില്‍ അധികാരത്തിലെത്തില്ലെന്ന് ഉറപ്പിക്കാന്‍ അവര്‍ക്ക് കഴിഞ്ഞു- സന്ദര്‍ശനത്തിന് ശേഷം നെതന്യാഹു പറഞ്ഞു.

ബന്ദികളെ കണ്ടെത്താനും അവരെ തിരിച്ചെത്തിക്കാനുമുള്ള ശ്രമങ്ങള്‍ തുടരുമെന്നും നെതന്യാഹു ആവര്‍ത്തിച്ചു. അതേസമയം, ജബലിയയിലെ അല്‍-ബലാദില്‍ ഇസ്‌റാഈല്‍ നടത്തിയ ആക്രമണത്തില്‍ മരിച്ചവരുടെ എണ്ണം 12 ആയി ഉയര്‍ന്നു.