ജിദ്ദ: സഊദിയില്‍ ദുല്‍ഖഅദ് 29 വ്യാഴാഴ്ച ദുല്‍ഹജ്ജ് മാസപ്പിറവി ദൃശ്യമാകാതിരുന്നത് കാരണം ദുല്‍ഹജ്ജ് ഒന്ന് നാളെയായിരിക്കുമെന്ന് സഊദിയിലെ വിവിധ മാധ്യമങ്ങള്‍ റിപ്പോര്‍ട്ട് ചെയ്തു. ഇതുപ്രകാരം അറഫ ദിനം സെപ്തംബര്‍ 11 ഞായറാഴ്ചയും ബലിപെരുന്നാള്‍ തിങ്കളാഴ്ചയുമായിരിക്കും. ഹജ്ജ് ചടങ്ങുകള്‍ക്ക് സെപ്തംബര്‍ 10 ദുല്‍ഹജ്ജ് എട്ടിന് തുടക്കം കുറിക്കും. സെപ്തംബര്‍ 15 ഓടെ (ദുല്‍ഹജ്ജ് 13ന്) ചടങ്ങുകള്‍ അവസാനിക്കും.

ഇന്ത്യന്‍ ഹജ്ജ് കമ്മിറ്റി വഴി ഹജ്ജ് നിര്‍വഹിക്കുന്ന 89,594 തീര്‍ത്ഥാടകര്‍ ഇന്നലെ വരെ സഊദിയിലെത്തി. 318 വിമാനങ്ങള്‍ ഇന്ത്യയില്‍ നിന്നും സര്‍വീസ് നടത്തി. ഇന്ത്യന്‍ ഹജ്ജ് കമ്മിറ്റി വഴി എത്തിയ എല്ലാ തീര്‍ത്ഥാടകരും ഇപ്പോള്‍ മക്കയിലാണ് ഉള്ളത്. കേരളത്തില്‍ നിന്നും സംസ്ഥാന ഹജ്ജ് കമ്മിറ്റി വഴിയുള്ള 8700 ഓളം തീര്‍ഥാടകര്‍ സഊദിയിലെത്തി. ഇന്ത്യയില്‍ നിന്നുള്ള ഹജ്ജ് വിമാന സര്‍വീസ് തിങ്കളാഴ്ച അവസാനിക്കും. അതേസമയം ഇന്ത്യയില്‍ നിന്നും സ്വകാര്യ ഗ്രൂപ്പുകള്‍ വഴി ഹജ്ജ് നിര്‍വഹിക്കുന്ന മുപ്പത്തിയാറായിരത്തോളം തീര്‍ത്ഥാടകരില്‍ ഭൂരിഭാഗവും സഊദിയിലെത്തി. ഇതില്‍ മലയാളികള്‍ ഇപ്പോള്‍ മദീനാ സന്ദര്‍ശനത്തിലാണ്. ഹജ്ജിനു മുമ്പായി ഇവര്‍ മക്കയില്‍ തിരിച്ചെത്തും.