പൂച്ചാക്കല്‍: ഇരുട്ടിന്റെ മറവില്‍ പൂച്ചാക്കല്‍ പാലത്തില്‍ കക്കൂസ് മാലിന്യം തള്ളി.
ഇന്നലെ രാത്രി തെക്കേക്കരയില്‍ പുതിയ പാലത്തില്‍ നിന്നും താഴെക്കാണ് കക്കൂസ് മാലിന്യം തള്ളിയത്.റോഡിലും വഴിയിലും മാലിന്യം ഒഴുകി ദുര്‍ഗന്ധം വമിക്കുന്നതിനാല്‍ സഹിക്കാനാവാതെ യാത്രക്കാര്‍ മൂക്കുപൊത്തിയാണ് ഇതുവഴി കടന്നുപോകുന്നത്. മഴവെള്ളത്തില്‍ മാലിന്യം സമീപത്തെ തോട്ടിലേക്ക് ഒലിച്ചിറങ്ങിയതോടെ പകര്‍ച്ചവ്യാധി ഭിഷണിയും ഈ പ്രദേശത്ത് നിലനില്‍ക്കുന്നുണ്ട്. രാത്രികാലങ്ങളില്‍ പ്രദേശങ്ങളില്‍ കക്കൂസ് മാലിന്യം തള്ളുന്നത് പതിവായിരിക്കുകയാണ്. ചേര്‍ത്തല അരൂക്കുറ്റി റോഡിന്റെ വശങ്ങളിലാണ് ടാങ്കര്‍ ലോറിയില്‍ കൊണ്ടുവരുന്ന മാലിന്യം പമ്പ് ചെയ്ത് ഒഴുക്കി വിടുന്നത്.
പൂച്ചാക്കല്‍ തോട്ടിലേക്ക് മാലിന്യം നിക്ഷേപിക്കുന്നതിനെതിരെ ജാഗ്രത സമിതി രൂപീകരിച്ചുവെങ്കിലും യാതൊരു പരിഹാരവുമുണ്ടായിട്ടില്ല.
എറണാകുളം മേഖലകളില്‍ നിന്നും കയറ്റി വരുന്ന കക്കൂസ് മാലിന്യം ഗ്രാമപ്രദേശങ്ങളിലെ തോടുകളിലും കുളങ്ങളിലും റോഡുകളിലുമാണ് നിക്ഷേപിക്കുന്നത്.