ജിദ്ദ: നാളെ മുതല്‍ സഊദിയിലെ മൊബൈല്‍ കടകളില്‍ സമ്പൂര്‍ണ സ്വദേശിവല്‍ക്കരണം നടപ്പാക്കുന്നതിന്റെ ഭാഗമായി എല്ലാ പഴുതുകളും അടച്ച് തൊഴില്‍ മന്ത്രാലയം.

തീരുമാനം ലംഘിച്ച് വിദേശികളെ ജോലിക്കുവയ്ക്കുന്ന സ്ഥാപനങ്ങള്‍ക്ക് 20,000 റിയാല്‍ പിഴ ചുമത്തുമെന്നും വിദേശികളുടെ എണ്ണം കൂടുന്നതിനനുസരിച്ച് പിഴ ഇരട്ടിയാവുമെന്നും മന്ത്രാലയ വക്താവ് ഖാലിദ് അബല്‍ഖൈല്‍ അറിയിച്ചു. ഇതിനു പുറമെ മറ്റു ശിക്ഷാ നടപടികളുമുണ്ടാവും. സമ്പൂര്‍ണ സ്വദേശിവല്‍ക്കരണം നടപ്പാക്കുന്നതിന് കൂടുതല്‍ സമയം അനുവദിക്കുകയില്ല. നിയമലംഘനത്തിന്റെ ഭാഗമായുള്ള നടപടികളില്‍ നിന്നും രക്ഷനേടാന്‍ കടയുടമകള്‍ പുതിയ വഴികള്‍ തേടുന്നത് മന്ത്രാലയത്തിന്റെ ശ്രദ്ധയില്‍പ്പെട്ടിട്ടുണ്ടെന്നും അദ്ദേഹം പറഞ്ഞു.
ഇതിനിടെ മൊബൈല്‍ മേഖലയ്ക്ക് പുറമെ ഗതാഗത വകുപ്പിലും സ്ത്രീകളെ നിയമിക്കാന്‍ തീരുമാനമായി. ഇതിനായി പ്രത്യേക വിഭാഗമുണ്ടാക്കണമെന്ന് ഗതാഗത മന്ത്രി സുലൈമാന്‍ അല്‍ ഹമദാന്‍ ഉത്തരവിട്ടു.

സ്ത്രീകള്‍ക്കുള്ള പ്രത്യേക വിഭാഗത്തില്‍ അവരുടെ സ്വകാര്യത ഉറപ്പാക്കണമെന്നും നിര്‍ദേശമുണ്ട്. ഇതിന്റെ ഭാഗമായി സ്ത്രീകള്‍ക്കുള്ള സൗകര്യങ്ങള്‍ ഉറപ്പുവരുത്തുന്നതിന് മന്ത്രാലയം വനിതാ സൂപ്പര്‍വൈസര്‍മാരെ നിയോഗിച്ചു. സ്ത്രീ ജീവനക്കാര്‍ക്ക് വേണ്ടി വെബ്‌സൈറ്റില്‍ പരസ്യവും നല്‍കിക്കഴിഞ്ഞു.

രാജ്യത്ത് ഒഴിവുള്ള എല്ലായിടത്തും സ്ത്രീകള്‍ അപേക്ഷ നല്‍കാനും നിര്‍ദേശിച്ചിട്ടുണ്ട്. നിലവില്‍ 20 മേഖലകളിലായി 806000 സഊദി വനിതകള്‍ ജോലി ചെയ്യുന്നുണ്ട്. ഇതില്‍ 71 ശതമാനവും വിദ്യാഭ്യാസ മേഖലയിലാണ്.
പതിമൂന്ന് ശതമാനം ആരോഗ്യ സാമൂഹിക സേവനരംഗത്തും അഞ്ചു ശതമാനം പൊതുഭരണ വിഭാഗത്തിലും പ്രതിരോധ സാമൂഹിക സുരക്ഷാ രംഗത്തും ജോലി ചെയ്യുന്നു. പുറമെ, ഉല്‍പാദക, നിര്‍മാണ, ഖനന, കാര്‍ഷിക, വന, മത്സ്യബന്ധന മേഖലകളിലും സ്ത്രീകള്‍ ജോലി ചെയ്യുന്നുണ്ട്.