വൈറ്റമിന്‍ സിയുടെയും പോഷകങ്ങളുടെയും ഗുണങ്ങളടങ്ങിയ പഴമാണ് ഓറഞ്ച്. അതുകൊണ്ടു തന്നെ ഇവ കഴിക്കുന്നത് ആരോഗ്യത്തിനും നല്ലതാണ്. വിറ്റാമിന്‍ സിയുടെ കലവറയായതിനാല്‍ തന്നെ ഓറഞ്ച് കഴിക്കുന്നത് വന്‍കുടലിലെ ക്യാന്‍സര്‍ സാധ്യത കുറയ്ക്കുന്നുവെന്ന് ആരോഗ്യവിദഗ്ധര്‍ പറയുന്നു. മാത്രമല്ല, ഇതിലടങ്ങിയിരിക്കുന്ന ആന്റി ഓക്‌സിഡന്റുകള്‍ ചര്‍മത്തെ സഹയാക്കുകയും ചെയ്യുന്നു. എന്നാല്‍ പലപ്പോഴും ഓറഞ്ച് വാങ്ങിക്കുമ്പോള്‍ കിട്ടുന്നത് ചീഞ്ഞതും അമിതമായ പുളിയുള്ളതും നീരില്ലാത്തതുമൊക്കെയാണ്. എന്നാല്‍ പലര്‍ക്കും എങ്ങനെയാണ് ശരിയായ രീതിയില്‍ ഓറഞ്ച് തിരഞ്ഞെടുത്ത് വാങ്ങുക എന്നത് അറിയില്ല. ചിലകാര്യങ്ങള്‍ ശ്രദ്ധിച്ചാല്‍ നല്ല ഓറഞ്ച് തന്നെ തിരഞ്ഞെടുക്കാന്‍ കഴിയുന്നതാണ്. 

ഓറഞ്ച് വാങ്ങിക്കുമ്പോള്‍ നിങ്ങള്‍ തന്നെ തെരഞ്ഞ് എടുക്കുക. എടുത്ത ശേഷം അതിന്റെ തൂക്കം നോക്കുക. കൈയ്ക്ക്  അത്യാവശ്യം ഭാരം തോന്നുകയാണെങ്കില്‍ അത്തരം ഓറഞ്ച് തെരഞ്ഞെടുക്കുക. അല്ലാതെ കടക്കാരന്‍ തരുന്നതും വാങ്ങി പോവാതിരിക്കുക. കാരണം ഈ ഓറഞ്ചില്‍ നീര് നന്നായി ഉണ്ടായിരിക്കും. 

ഞെക്കി നോക്കിയിട്ടു വേണം അതുപോലെ ഓറഞ്ച് തെരഞ്ഞെടുക്കാന്‍. കൂടുതല്‍ ഞെങ്ങുന്നതും തീരെ ഞെങ്ങാതിരിക്കുന്നതുമായ ഓറഞ്ച് എടുക്കാതിരിക്കുക. അമിതമായി ഞെങ്ങുന്നുണ്ടെങ്കില്‍ ആ ഓറഞ്ച് ചീയുവാനുളള സാധ്യത കൂടുതലാണ്. 

നിറംനോക്കി ഒരിക്കലും ഓറഞ്ച് തെരഞ്ഞെടുക്കരുത്. ഇതിന്റെ നിറത്തിലൊന്നും ഒരു കാര്യവുമില്ല. മാത്രമല്ല നിറമുള്ള ചില ഓറഞ്ചുകള്‍ ചീഞ്ഞിരിക്കാനും നീര് കുറഞ്ഞിരിക്കാനും സാധ്യതയുണ്ട്. എന്നാല്‍ പച്ചനിറത്തിലുള്ള ചില ഓറഞ്ചുകള്‍ക്ക് നല്ല രുചിയും നീരുമുണ്ടാവാം.

അതുപോലെ നല്ല കട്ടിയുള്ള തൊലിയുള്ള ഓറഞ്ചാണെങ്കിലും വാങ്ങാതിരിക്കുക. കാരണം തൊലികട്ടിയായി തുടങ്ങിയാല്‍ ഓറഞ്ചിന്റെ ഗുണവും നശിച്ചു തുടങ്ങിയിരിക്കും.