റിയാദ്: നിരീക്ഷണ കാമറകളില്‍ നിന്നുള്ള ദൃശ്യങ്ങള്‍ പകര്‍ത്തുന്നതും പ്രസിദ്ധീകരിക്കുന്നതും നിയമപരമായി വിലക്കിയെന്ന് വ്യക്തമാക്കി സഊദി ആഭ്യന്തര മന്ത്രാലയം. 2025 ജനുവരി 6നാണ് സഊദി ആഭ്യന്തര മന്ത്രാലയം ഇതേക്കുറിച്ചുള്ള അറിയിപ്പ് പുറത്തുവിട്ടത്.

'യൂസ് ഓഫ് സെക്യൂരിറ്റി സര്‍വൈലന്‍സ് കാമറാസ്' നിയമത്തിലെ വ്യവസ്ഥകള്‍ പ്രകാരമാണ് ദൃശ്യങ്ങള്‍ പകര്‍ത്തുന്നതിനും പ്രസിദ്ധീകരിക്കുന്നതിനും വിലക്കേര്‍പ്പെടുത്തിയതെന്ന് മന്ത്രാലയം ചൂണ്ടിക്കാട്ടി. സെക്യൂരിറ്റി സര്‍വൈലന്‍സ് കാമറകളില്‍ നിന്നുള്ള ദൃശ്യങ്ങള്‍ പകര്‍ത്തുന്നതിനും പ്രസിദ്ധീകരിക്കുന്നതിനും ഏതെങ്കിലും കോടതി ഉത്തരവിന്റെയോ അന്വേഷണ ഏജന്‍സിയില്‍ നിന്നുള്ള അപേക്ഷയുടെയോ അടിസ്ഥാനത്തില്‍ പ്രസിഡന്‍സി ഓഫ് സ്റ്റേറ്റ് സെക്യൂരിറ്റി മന്ത്രാലയത്തില്‍ നിന്നുള്ള അംഗീകാരം നിര്‍ബന്ധമാണെന്നും അധികൃതര്‍ പറഞ്ഞു. നിയമം ലംഘിക്കുന്നവര്‍ക്ക് 20000 റിയാല്‍ പിഴ ചുമത്തും. സെക്യൂരിറ്റി സര്‍വൈലന്‍സ് കാമറകള്‍, അവയിലെ ദൃശ്യങ്ങള്‍ എന്നിവ നശിപ്പിക്കുന്നവര്‍ക്കും ഇതേ ശിക്ഷ തന്നെയാണ് പ്രാബല്യത്തിലുള്ളത്.