മെൽബൺ: ബിഗ് ബാഷ് ലീഗിൽ മെൽബൺ സ്റ്റാർസിന് വേണ്ടി തകർപ്പൻ പ്രകടനവുമായി സൂപ്പർതാരം ഗ്ലെൻ മാക്‌സ്‌വെൽ. സിഡ്‌നി സിക്‌സേഴ്സിനെതിരെയാണ് മാക്‌സ്‌വെൽതിളങ്ങിയത്. മത്സരത്തിൽ 32 പന്തിൽ പുറത്താവാതെ 58 റൺസാണ് മാക്‌സ്‌വെൽ നേടിയത്. അഞ്ചു ഫോറുകളും മൂന്ന് സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്. 

ഈ തകർപ്പൻ പ്രകടനങ്ങൾക്ക് പിന്നാലെ ബിഗ് ബാഷ് ലീഗിൽ 3000 റൺസ് പൂർത്തിയാക്കാനും മാക്സ്വെല്ലിനു സാധിച്ചു. ടൂർണമെന്റിൽ 3000 റൺസ് പിന്നിടുന്ന ആറാമത്തെ താരം കൂടിയാണ് മാക്‌സ്‌വെൽ. ക്രിസ് ലിൻ, ആരോൺ ഫിഞ്ച്, ഡിആർസി ഷോർട്ട്, മോയ്‌സസ് ഹെൻറിക്‌സ്, ജോൺ വെൽസ് എന്നീ താരങ്ങൾ ആണ് ഇതിനു മുമ്പ് ഈ നേട്ടം സ്വന്തമാക്കിയിട്ടുള്ളത്. 

മത്സരത്തിൽ മാക്സ്‌വെല്ലിന് പുറമെ ബ്യൂ വെബ്സ്റ്റർ 41 പന്തിൽ 48 റൺസും നേടി. രണ്ട് ഫോറുകളും ഒരു സിക്സുമാണ് താരം നേടിയത്. ഇരുവരുടെയും തകർപ്പൻ ഇന്നിംഗ്‌സിന്റെ പിൻബലത്തിൽ മെൽബൺ 156 റൺസാണ് നേടിയത്. സിഡ്‌നിയുടെ ബൗളിങ്ങിൽ ഷോൺ ആബട്ട് മൂന്ന് വിക്കറ്റും ഹെയ്ഡൻ കെർ, ജാക്ക് എഡ്വേർഡ്സ് ഓരോ വിക്കറ്റ് വീതവും നേടി. 

വിജയലക്ഷ്യം പിന്തുടർന്നിറങ്ങിയ സിഡ്‌നിക്ക് 20 ഓവറിൽ ഒമ്പത് വിക്കറ്റ് നഷ്ടത്തിൽ 140 റൺസ് നേടാനേ സാധിച്ചുള്ളൂ. മെൽബണിനായി മാർക്ക് സ്റ്റെക്കറി മൂന്ന് വിക്കറ്റും മർക്കസ് സ്റ്റോണിസ്, ഉസാമ മിർ, പീറ്റർ സൈഡിൽ എന്നിവർ രണ്ട് വീതം വിക്കറ്റുകളും നേടി തകർപ്പൻ പ്രകടനമാണ് നടത്തിയത്. സിഡ്‌നിക്കായി ജെയിംസ് വിൻസ് അർദ്ധ സെഞ്ച്വറി നേടി. ആറ് ഫോറുകൾ ഉൾപ്പടെ 44 പന്തിൽ 53 റൺസാണ് താരം നേടിയത്.