ചാവക്കാട്: ദേശീയ പാതയില്‍ കാറും കണ്ടെയ്‌നര്‍ ലോറിയും കൂട്ടിയിടിച്ചു വയോധികയുള്‍പ്പടെ നാല് പേര്‍ക്ക് പരുക്ക്. കാസര്‍കോട് ജില്ലയിലെ കാഞ്ഞങ്ങാട് സ്വദേശി വാരിക്കാട്ടില്‍ രാജേഷ് (41), മാതാവ് സിസിലി (69), സഹോദര പുത്രന്‍ സുബിന്‍ (23), ബന്ധു കാഞ്ഞങ്ങാട് രാജപുരം ജോമോന്‍ (43) എന്നിവര്‍ക്കാണ് പരുക്കേറ്റത്.
നാല് പേരേയും മുതുവട്ടൂര്‍ രാജാ ആശുപത്രിയില്‍ പ്രാഥമിക ചികിത്സ നല്‍കിയ ശേഷം തൃശൂരിലെ സ്വകാര്യ ആശുപത്രിയിലേക്ക് കൊണ്ടുപോയി. കാലില്‍ പരുക്കേറ്റ ജോമോനെ പിന്നീട് കാഞ്ഞങ്ങാട്ടേക്ക് കൊണ്ടുപോയി. വ്യാഴാഴ്ച്ച പുലര്‍ച്ചെ അഞ്ചിന് മണത്തല പള്ളിക്ക് സമീപമാണ് അപകടമുണ്ടായത്.
കാഞ്ഞങ്ങാട്ടു നിന്ന് കോട്ടയത്തെ ഭാര്യവീട്ടിലേക്ക് പോകുയായിരുന്നു രാജേഷും ബന്ധുക്കളും. ഇവരുടെ വാഹനത്തിലെ ഡ്രൈവര്‍ മയങ്ങിപ്പോയതാണ് അപകടത്തിന് കാരണമെന്ന് നാട്ടുകാര്‍ പറഞ്ഞു.
നിയന്ത്രണം വിട്ടു വന്ന കാര്‍ കണ്ടെയിനര്‍ ലോറിയില്‍ ഇടിക്കുകയായിരുന്നു. ഇടിയുടെ ആഘാതത്തില്‍ കാറിന്റെ മുന്‍ഭാഗം പൂര്‍ണമായും തകര്‍ന്നു.