കല്‍പ്പറ്റ: സഹോദരങ്ങളായ ലോറി ഡ്രൈവര്‍മാരെ ഒരു സംഘം ഓട്ടോ ഡ്രൈവര്‍മാര്‍ മര്‍ദിച്ചെന്ന് പരാതി. സുല്‍ത്താന്‍ ബത്തേരി സ്വദേശി യൂസഫ് കാപ്പാട്ടില്‍(35), സഹോദരന്‍ ഇസ്മായില്‍(42) എന്നിവര്‍ക്കാണ് ഇന്നലെ പുലര്‍ച്ചെ രണ്ടരക്ക് കൈനാട്ടിയില്‍ വെച്ച് മര്‍ദനമേറ്റത്.
തലക്ക് ഗുരുതരമായി പരുക്കേറ്റ ഇസ്മായില്‍ മേപ്പാടി വിംസ് മെഡിക്കല്‍ കോളജിലെ തീവ്ര പരിചരണ വിഭാഗത്തില്‍ ചികിത്സയിലാണ്. സംഭവവുമായി ബന്ധപ്പെട്ട് ടൗണിലെ ഓട്ടോ ഡ്രൈവര്‍മാരായ എമിലി സ്വദേശികളായ പുതുക്കുടി ജംഷീര്‍, മുയ്യാരിക്കണ്ടി അനസ് എന്നിവരെ കല്‍പ്പറ്റ പൊലിസ് അറസ്റ്റ് ചെയ്തു. പാലക്കാടു നിന്ന് രണ്ട് ലോറികളില്‍ ചരക്കുമായി സുല്‍ത്താന്‍ ബത്തേരിയിലേക്ക് പോകുന്നതിനിടെയാണ് ഇവര്‍ക്ക് മര്‍ദനമേറ്റത്.
കല്‍പ്പറ്റ ടൗണില്‍ നിന്ന് യാത്രക്കാരായ മറ്റൊരു ലോറി ഡ്രൈവറെ ഇസ്മായില്‍ വാഹനത്തില്‍ കയറ്റിയത് ഓട്ടോ ഡ്രൈവര്‍മാര്‍ ചോദ്യം ചെയ്തു. വാക്കേറ്റമായതോടെ ഇസ്മായില്‍ യാത്രക്കാരനെ ടൗണില്‍ തന്നെ ഇറക്കി യാത്ര തുടര്‍ന്നു. ലോറി കൈനാട്ടി ജങ്ഷനിലെത്തിയപ്പോള്‍ രണ്ട് ഓട്ടോറിക്ഷകളിലായി എത്തിയ പത്തംഗസംഘം വാഹനം തടഞ്ഞിട്ട് ഇസ്മായിലിനെും യൂസഫിനെയും മര്‍ദിക്കുകയായിരുന്നു. ഇതിനിടെ പൊലിസെത്തിയതോടെ സംഘം രക്ഷപ്പെട്ടു.കണ്ടാലറിയാവുന്ന പത്തു പേര്‍ക്കെതിരെയാണ് പൊലിസ് കേസ് രജിസ്റ്റര്‍ ചെയ്തത്.