പെഷാവര്‍: വടക്കു പടിഞ്ഞാറന്‍ പാകിസ്താനിലെ മര്‍ദാന്‍ ടൗണ്‍ ജില്ലാ കോടതിയിലുണ്ടായ ഇരട്ട ചാവേര്‍ സ്‌ഫോടനത്തില്‍ 14 പേര്‍ കൊല്ലപ്പെട്ടു. ഖൈബര്‍ പക്തുന്‍വ പ്രവിശ്യയിലെ കോടതിയിലെത്തിയ ചാവേര്‍ ആദ്യം പൊലിസിനെതിരേ ഗ്രനേഡ് എറിയുകയായിരുന്നു. കൊല്ലപ്പെട്ട 12 പേര്‍ അഭിഭാഷകരാണ്. പൊലിസുകാരനും തദ്ദേശവാസിയുമാണ് മറ്റു രണ്ടു പേര്‍. 52 പേര്‍ക്ക് പരുക്കേറ്റുവെന്ന് മുഖ്യ രക്ഷാസേനാ ഓഫിസര്‍ ഹാരിസ് ഹബീബ് പറഞ്ഞു.
നേരത്തെ പെഷാവറിലെ ക്രിസ്ത്യന്‍ കോളനിയെ ലക്ഷ്യം വച്ച് നാലു ചാവേറുകള്‍ ആക്രമണത്തിനു മുതിര്‍ന്നത് സൈന്യം വിഫലമാക്കിയിരുന്നു. ആക്രമണത്തില്‍ ചാവേറുകള്‍ കൊല്ലപ്പെട്ടു. വടക്കന്‍ പെഷാവറിലെ വര്‍സക് ദാം കോളനിയിലാണ് ആക്രമണം നടന്നത്. അന്വേഷണം നടക്കുന്നതായും കൊല്ലപ്പെട്ടവരെല്ലാം ചാവേറുകളാണെന്നും സൈനിക വക്താവ് അസിം ബജ്‌വ പറഞ്ഞു. എന്നാല്‍ ഈ ആക്രമണത്തില്‍ ഒരു സാധാരണക്കാരന്‍ കൊല്ലപ്പെട്ടതായും നിരവധി പേര്‍ക്ക് പരുക്കേറ്റിട്ടുണ്ടെന്നും പ്രാദേശിക ഉറവിടങ്ങളെ ഉദ്ധരിച്ച് അല്‍ജസീറ റിപ്പോര്‍ട്ട് ചെയ്തു. രണ്ടു ചാവേറുകള്‍ അരയില്‍ കെട്ടിവച്ച ബോംബ് പെട്ടിത്തെറിച്ചും മറ്റു രണ്ടു പേര്‍ വെടിവയ്പിലുമാണ് കൊല്ലപ്പെട്ടത്. ആക്രമണത്തിന്റെ ഉത്തരവാദിത്വം പാക് താലിബാന്റെ വിഭാഗമായ ജമാഅത്തു അഹ്‌രാര്‍ ഏറ്റെടുത്തിട്ടുണ്ട്. സര്‍ക്കാര്‍ ഓഫിസുകള്‍ കോടതികള്‍ എന്നിവിടങ്ങളില്‍ നിന്നു ജനങ്ങള്‍ അകലം പാലിക്കണമെന്നും കൂടുതല്‍ ആക്രമണങ്ങള്‍ ഉണ്ടാകുമെന്നും സംഘടനയുടെ വക്താവ് മുന്നറിയിപ്പ് നല്‍കി.