ബ്രസ്സല്‍സ്: അന്താരാഷ്ട്ര സൗഹൃദ ഫുട്‌ബോള്‍ മത്സരങ്ങളില്‍ യൂറോ കപ്പ് ചാംപ്യന്‍മാരായ പോര്‍ച്ചുഗലിനും സ്‌പെയിനിനും വമ്പന്‍ ജയം. എന്നാല്‍ കരുത്തരായ ഇറ്റലി, ഹോളണ്ട്, എന്നിവര്‍ പരാജയപ്പെട്ടു.
ജിബ്രാള്‍ട്ടറിനെ എതിരില്ലാത്ത അഞ്ചു ഗോളിനാണ് പോര്‍ച്ചുഗല്‍ തകര്‍ത്തത്. നാനി ഇരട്ട ഗോള്‍ നേടിയപ്പോള്‍ ജോവാ കാന്‍സലോ, ബെര്‍നാര്‍ഡോ സില്‍വ, പെപ്പെ എന്നിവര്‍ ശേഷിച്ച ഗോള്‍ സ്വന്തമാക്കി. സ്‌പെയിന്‍ എതിരില്ലാത്ത രണ്ടു ഗോളിന് ബെല്‍ജിയത്തെയാണ് പരാജയപ്പെടുത്തിയത്. ഡേവിഡ് സില്‍വ സ്പാനിഷ് ടീമിനായി ഇരട്ട ഗോള്‍ നേടി.
അതേസമയം ഇറ്റലിയെ യൂറോ കപ്പ് റണ്ണറപ്പുകളായ ഫ്രാന്‍സ് ഒന്നിനെതിരേ മൂന്നു ഗോളുകള്‍ക്കാണ് തകര്‍ത്തത്. ആന്റണി മാര്‍ഷ്യല്‍, ഒലിവര്‍ ജിറൂദ്, ലെയ്‌വിന്‍ കുറസാവ എന്നിവര്‍ ഫ്രാന്‍സിനായി സ്‌കോര്‍ ചെയ്തപ്പോള്‍ ഗ്രേഷ്യാനോ പെല്ലെ ഇറ്റലിയുടെ ആശ്വാസ ഗോള്‍ നേടി. ഹോളണ്ട് ഒന്നിനെതിരേ രണ്ടു ഗോളുകള്‍ക്ക് ഗ്രീസിനോടാണ് തോറ്റത്. കോണ്‍സ്റ്റാന്‍ഡിനോസ് മിത്രോഗ്ലു, ഗയാനിസ് ജിയാനിയോട്ടാസ് എന്നിവര്‍ ഗ്രീസിന് വേണ്ടി ഗോള്‍ നേടി.