തിരുവന്തപുരം: പുത്തന്‍ പ്രതിഭകളെ കണ്ടെത്തുന്നതിന്റെ ഭാഗമായി കേരള ബ്ലാസ്റ്റേഴ്‌സ് സംഘടിപ്പിക്കുന്ന സെലക്ഷന്‍ ട്രയല്‍സ് ഇന്ന് ആരംഭിക്കും. വിവിധ സംസ്ഥാനങ്ങളില്‍ നിന്നായി 18 താരങ്ങളാണ് ട്രയല്‍സില്‍ പങ്കടെുക്കുന്നത്. ഇവരില്‍ നിന്നു തിരഞ്ഞെടുക്കപ്പെടുന്നവര്‍ക്ക് ഇന്ത്യന്‍ സൂപ്പര്‍ ലീഗിന്റെ മൂന്നാം സീസണില്‍ കളിക്കാന്‍ സാധിക്കും. തിരുവനന്തപുരത്തെ ഗ്രീന്‍ഫീല്‍ഡ് സ്റ്റേഡിയത്തിലാണ് ട്രയല്‍സ് നടത്തുക.
ബ്ലാസ്റ്റേഴ്‌സിന്റെ യൂത്ത് ഡെവലപ്‌മെന്റ് പ്രോഗ്രാമിന്റെ ഭാഗമായിട്ടാണ് ട്രയല്‍സ് സംഘടിപ്പിക്കുന്നത്. ടീമിന്റെ പ്ലേയര്‍ സ്‌കൗട്ട് എന്‍.പി പ്രദീപ് ട്രയല്‍സിന് നേതൃത്വം നല്‍കും. കേരളം പ്രതിഭകള്‍ ഒരുപാടുള്ള നാടാണെന്നും ഇതോടൊപ്പം പുറത്തു നിന്നുള്ള താരങ്ങളെയും ഉള്‍ക്കൊള്ളിച്ചുള്ള ടീമിനെ വാര്‍ത്തെടുക്കാനാണ് ട്രയല്‍സ് സംഘടിപ്പിക്കുന്നതെന്നും പ്രദീപ് വ്യക്തമാക്കി.