ന്യൂയോര്‍ക്ക്: യു.എസ് ഓപണ്‍ പുരുഷ വിഭാഗം സിംഗിള്‍സില്‍ ബ്രിട്ടന്റെ ആന്‍ഡി മുറെ, സ്വിസ് താരം സ്റ്റാനിസ്ലാസ് വാവ്‌റിങ്ക എന്നിവര്‍ മൂന്നാം റൗണ്ടില്‍ കടന്നു. മുറെ സ്പാനിഷ് താരം മാര്‍സല്‍ ഗ്രാനോല്ലേഴ്‌സിനെയാണ് പരാജയപ്പെടുത്തിയത്. സ്‌കോര്‍ 6-4, 6-1, 6-4. മികവോടെ തുടങ്ങിയ മുറെയ്ക്ക് മുന്നില്‍ ഗ്രാനോല്ലേഴ്‌സിന് പിടിച്ചു നില്‍ക്കാനായില്ല. ഇടയ്ക്ക് മഴ പെയ്തതിനാല്‍ മേല്‍ക്കൂര അടച്ച ശേഷമാണ് കളി ആരംഭിച്ചത്. രണ്ടാം സെറ്റ് സ്പാനിഷ് താരത്തിന് യാതൊരവസരവും നല്‍കാതെ സ്വന്തമാക്കാന്‍ മുറെയ്ക്ക് സാധിച്ചു. മൂന്നാം റൗണ്ടില്‍ ഇറ്റലിയുടെ പൗലോ ലോറെന്‍സിയാണ് മുറെയ്ക്ക് എതിരാളി.
ഇറ്റാലിയന്‍ താരം അലസാന്ദ്രോ ജിയാന്നെസിയെ അനായാസം മറികടന്നാണ് വാവ്‌റിങ്ക മൂന്നാം റൗണ്ടിലേക്ക് മുന്നേറിയത്. സ്‌കോര്‍ 6-1, 7-6, 7-5. മൂന്നു സെറ്റ് നീണ്ട പോരാട്ടത്തില്‍ രണ്ടാം സെറ്റില്‍ മാത്രമാണ് ഇറ്റാലിയന്‍ താരം തിരിച്ചടിക്കാന്‍ ശ്രമിച്ചത്. മൂന്നാം സെറ്റില്‍ ജിയാന്നെസിയുടെ പിഴവുകള്‍ മുതലെടുത്ത വാവ്‌റിങ്ക സെറ്റും മത്സരവും സ്വന്തമാക്കുകയായിരുന്നു. ബ്രിട്ടന്റെ ഡാന്‍ ഇവാന്‍സാണ് വാവ്‌റിങ്കയ്ക്ക് അടുത്ത റൗണ്ടില്‍ എതിരാളി. മറ്റു മത്സരങ്ങളില്‍ നിഷികോരിയും കിര്‍ഗിയോസും ജയത്തോടെ മൂന്നാം റൗണ്ടിലെത്തിയിട്ടുണ്ട്.
വനിതാ വിഭാഗം സിംഗിള്‍സില്‍ വില്യംസ് സഹോദരിമാര്‍, സിമോണ ഹാലെപ്, റാഡ്വന്‍സ്‌ക എന്നിവര്‍ മൂന്നാം റൗണ്ടിലെത്തി. നാട്ടുകാരി വാനിയ കിങിനെയാണ് സെറീന പരാജയപ്പെടുത്തിയത്. സ്‌കോര്‍ 6-3, 6-3. ജയത്തോടെ മാര്‍ട്ടിന നവരത്തിലോവയുടെ ഏറ്റവുമധികം ഗ്രാന്‍ഡ് സ്ലാം മത്സരങ്ങളിലെ ജയമെന്ന റെക്കോര്‍ഡിനൊപ്പമെത്താനും സെറീനയ്ക്ക് സാധിച്ചു. മത്സരത്തില്‍ 13 എയ്‌സുകള്‍ തൊടുത്ത് സെറീന അനായാസമായാണ് വാനിയയെ മറികടന്നത്.
വീനസ് ജര്‍മനിയുടെ ജൂലിയ ജോര്‍ജസിനെയാണ് പരാജയപ്പെടുത്തിയത്. സ്‌കോര്‍ 6-2,6-3. യു.എസ് ഓപണില്‍ വീനസിന്റെ 70ാം ജയമാണിത്. സിമോണ ഹാലെപ് സഫറോവയെ 6-3, 6-4 എന്ന സ്‌കോറിനും റാഡ്വന്‍സ്‌ക ബ്രോഡിയെ 7-6, 6-3 എന്ന സ്‌കോറിനുമാണ് പരാജയപ്പെടുത്തിയത്.