ചില സമയത്ത് അത്യാവശ്യത്തിന് രക്തം നല്‍കാന്‍ ആളെകിട്ടാത്ത അവസ്ഥ പലര്‍ക്കുമുണ്ടാവാറുണ്ട്. എന്നാല്‍ ആ പേടി ഇനി വേണ്ടെന്നാണ് കേരള പൊലിസ് പറയുന്നത്. ഇനി ആവശ്യത്തിനുളള രക്തം തരാന്‍ പോല്‍ ബ്ലഡ് എന്ന സംരംഭമുണ്ടെന്ന് പറയുകയാണ് കേരള പൊലിസ്. ഫേസ്ബുക്ക് പേജിലൂടെയാണ് ഇക്കാര്യം കേരള പൊലിസ് അറിയിച്ചിരിക്കുന്നത്. 

കേരളപൊലിസ് പറയുന്നത്

അടിയന്തര ഘട്ടങ്ങളില്‍ രക്തത്തിനായി കേരള പൊലിസിന്റെ പോല്‍ ബ്ലഡ്. ആവശ്യക്കാര്‍ക്കു വേണ്ടി ആവശ്യസമയത്തു തന്നെ രക്തം എത്തിച്ചു നല്‍കാനായി ആരംഭിച്ച കേരള പൊലിസിന്റെ സംരംഭമാണ് പോല്‍ ബ്ലഡ്. അടിയന്തര ഘട്ടങ്ങളില്‍ രക്തത്തിനായി കേരള പൊലിസിന്റെ പോല്‍ ബ്ലഡ് എന്ന ഓണ്‍ലൈന്‍ സേവനം നിങ്ങള്‍ക്കും പ്രയോജനപ്പെടുത്താം. കേരള പൊലിസിന്റെ മൊബൈല്‍ ആപ്ലക്കേഷന്‍ ആയ പോല്‍ ആപ്പിന്റെ സഹായത്തോടെയാണ് പ്രവര്‍ത്തനം.

 കേരള സ്റ്റേറ്റ് എയ്ഡഡ് കണ്‍ട്രോള്‍ സൊസൈറ്റിയുമായി ചേര്‍ന്നു പ്രവര്‍ത്തിക്കുന്ന പോല്‍ ബ്ലഡില്‍ ആര്‍ക്കും അംഗങ്ങളാവാം. രക്തദാനത്തിനും സ്വീകരണത്തിനുമായി രജിസ്റ്റര്‍ ചെയ്യാന്‍ പ്ലേസ്റ്റോറില്‍ നിന്ന് പോല്‍ ആപ്പ് ഡൗണ്‍ലോഡ് ചെയ്യുക. ആപ്പില്‍ പോല്‍ ബ്ലഡ് എന്ന വിഭാഗം തെരഞ്ഞെടുക്കുക. രക്തം നല്‍കാന്‍ ഡോണര്‍ എന്ന രജിസ്‌ട്രേഷന്‍ ഫോറം പൂരിപ്പിക്കുക.രക്തം ആവശ്യമുള്ളവര്‍ റെസ്പ്യന്റ് എന്ന ഫോറം പൂരിപ്പിക്കുക. രജിസ്‌ട്രേഷന്‍ പൂര്‍ത്തിയായാല്‍ കണ്‍ട്രോള്‍ റൂമില്‍ നിന്നു നിങ്ങളുമായി ബന്ധപ്പെടും.

രക്തം അടിയന്തര ഘട്ടങ്ങളില്‍ സ്വീകരിക്കാന്‍ മാത്രമല്ല, രക്തദാനത്തിനും നാം തയാറാവണം. ഇതുവരെ പൊതുജനങ്ങളുടെ സഹായത്തോടെ ഒരു ലക്ഷം യൂണിറ്റോളം രക്തം ആവശ്യക്കാര്‍ക്ക് എത്തിച്ചു നല്‍കാന്‍ കേരള പൊലിസിന് കഴിഞ്ഞിട്ടുണ്ട്. രക്തം നല്‍കാന്‍ നിങ്ങളും മുന്നോട്ടു വന്നാല്‍ മാത്രമേ ഞങ്ങള്‍ക്ക് ഈ സേവനം സുഗമമായി മുന്നോട്ടു കൊണ്ടുപോകാന്‍ കഴിയൂവെന്ന് ഓര്‍മപ്പെടുത്തുന്നു.
പോല്‍ ആപ്പ് ഡൗണ്‍ലോഡ് ചെയ്യാനുള്ള ലിങ്ക്

https://play.google.com/store/apps/details...

https://apps.apple.com/.../polappkerala.../id1500016489