മംഗളൂരു: കേന്ദ്ര സര്‍ക്കാറിന്റെ തൊഴിലാളി വിരുദ്ധ നയങ്ങള്‍ക്കെതിരേ സംയുക്ത ട്രേഡ് യൂനിയനുകളുടെ നേതൃത്വത്തില്‍ നടന്ന പണിമുടക്ക്   മംഗളൂരുവിലും ഏറെക്കുറെ പൂര്‍ണം. ബസുകളും മറ്റു പൊതുവാഹനങ്ങളൊന്നും തന്നെ നിരത്തിലിറങ്ങിയില്ല. ചില പ്രദേശങ്ങളില്‍  സ്വകാര്യ വാഹനങ്ങള്‍ ഓടി. അതേസമയം, ബംഗളൂരുവില്‍ നിന്നു മണിപ്പാലിലേക്ക് പോവുകയായിരുന്ന കെ.എസ്.ആര്‍.ടി.സി ബസിന് നേരെ പടീലില്‍ വച്ച്  കല്ലേറുണ്ടായി. കെ.എസ് റാവു റോഡിലും മറ്റൊരു ട്രാന്‍സ്‌പോര്‍ട്  ബസിന് നേരെ കല്ലേറുണ്ടായി. കുത്താര്‍, സുറത്കല്‍, ഉര്‍വ എന്നിവിടങ്ങളില്‍  പാതയില്‍ ടയര്‍ കത്തിക്കുകയും ചെയ്തു. നഗരത്തിലെ  മാര്‍ക്കറ്റുകള്‍ അടഞ്ഞു കിടന്നു.