എടച്ചേരി: ഓണപ്പരീക്ഷ തുടങ്ങിയിട്ടും പാഠപുസ്തകങ്ങള്‍ പല സ്‌കൂളുകളിലും എത്താത്തതില്‍ പ്രതിഷേധം നടന്നുകൊണ്ടിരിക്കെ ചോദ്യപേപ്പറുകളും വൈകുന്നു. പരീക്ഷ തുടങ്ങി മൂന്നുദിവസമായിട്ടും മുഴുവന്‍ വിഷയങ്ങളുടെയും ചോദ്യപേപ്പറുകള്‍ മിക്ക സ്‌കൂളുകളിലും എത്തിയിട്ടില്ല. മുന്‍വര്‍ഷങ്ങളില്‍ എല്ലാ വിഷയങ്ങളുടെയും ചോദ്യക്കടലാസുകള്‍ ഒന്നിച്ചാണ് സ്‌കൂളുകളില്‍ എത്തിച്ചിരുന്നത്. എന്നാല്‍ ഇത്തവണ പ്രൈമറിതലങ്ങളില്‍ ഓരോ ക്ലാസിലെയും രണ്ടുവിഷയങ്ങളുടെ ചോദ്യപേപ്പറുകള്‍ മാത്രമാണ് ലഭ്യമായത്.
നേരത്തെ കുട്ടികള്‍ക്ക് കൊടുത്ത ടൈംടേബിള്‍ പ്രകാരം വെള്ളിയാഴ്ച പരീക്ഷ നടക്കേണ്ടതായിരുന്നു. എന്നാല്‍ ദേശീയ പണിമുടക്ക് കാരണം ഈ പരീക്ഷ സെപ്റ്റംബര്‍ ഒന്‍പതിലേക്ക് മാറ്റിയത് പിന്നീടാണ്. സമരമില്ലായിരുന്നെങ്കില്‍ ഈ പരീക്ഷ ചോദ്യപേപ്പറെത്താത്തതിനാല്‍ മുടങ്ങുമായിരുന്നു. ഒന്നു മുതല്‍ ഏഴുവരെ ക്ലാസുകളിലേക്കുള്ള ചോദ്യപേപ്പര്‍ സര്‍വശിക്ഷാ അഭിയാനാണ് (എസ്.എസ്.എ) തയാറാക്കുന്നത്.
മുന്‍കൂട്ടി തയാറാക്കിയ ചോദ്യപേപ്പറുകള്‍ നേരത്തെ തന്നെ ബന്ധപ്പെട്ട ബി.ആര്‍.സികളില്‍ എത്തിക്കേണ്ടതായിരുന്നു. വ്യാഴാഴ്ച വൈകിട്ടോടെ ചോദ്യപേപ്പര്‍ ബി.ആര്‍.സികളില്‍ എത്തുമെന്ന് ഫോണ്‍ സന്ദേശമുണ്ടായിരുന്നെങ്കിലും ആറ് മണിയായിട്ടും എത്താത്തതിനാല്‍ ജീവനക്കാര്‍ ഓഫിസ് പൂട്ടി പോവുകയാണുണ്ടായത്. ഇനി ശനിയാഴ്ചയെ ബി.ആര്‍.സികളിലേക്ക് ചോദ്യപേപ്പറുകള്‍ എത്താന്‍ സാധ്യതയുള്ളൂ. അവിടെ നിന്ന് തരംതിരിച്ചതിനു ശേഷം തിങ്കളാഴ്ചയോടെ സ്‌കൂളുകളില്‍ എത്തുമെന്നാണ് പ്രതീക്ഷിക്കുന്നത്.