എടപ്പാള്‍: പൊതുനിരത്തിനു സമീപത്തെ ഒഴിഞ്ഞ കെട്ടിടത്തിലിരുന്നു മദ്യപിച്ച് അപമര്യാദയോടെ പെരുമാറിയതു ചോദ്യം ചെയ്ത യുവാക്കളെ അഞ്ചംഗ സംഘം മര്‍ദിച്ചതായി പരാതി. ഉദിനിക്കര സ്വദേശികളായ സുബി, അജീഷ് എന്നിവര്‍ക്കാണു പരുക്കേറ്റത്. ഇവരെ എടപ്പാളിലെ സ്വകാര്യ ആശുപത്രിയില്‍ പ്രവേശിപ്പിച്ചു. എടപ്പാള്‍ കുറ്റിപ്പുറം റോഡിലെ ഒഴിഞ്ഞ കെട്ടിടത്തിനു സമീപം ഇന്നലെ വൈകുന്നേരമാണു സംഭവം.
കഴിഞ്ഞ കുറച്ചു ദിവസമായി മദ്യപാനം പതിവായിരുന്നുവെന്നും ഇന്നലെ പണിമുടക്കായതിനാല്‍ പകല്‍ സമയത്തു തന്നെ മദ്യപാനം ആരംഭിക്കുകയും അതു വഴി കടന്നു പോകുന്നവരെ അസഭ്യം പറയുകയുമായിരുന്നുവെന്നു നാട്ടുകാര്‍ പറയുന്നു. ഇതിനിടയില്‍ ഇതുവഴി കടന്നുപോയ സുബിയും ബാലനും ഇതു ചോദ്യം ചെയ്യുകയായിരുന്നു. ഇതോടെസംഘം സുബിയെ മര്‍ദ്ദിച്ചു. ഇതോടെ അതുവഴി വന്ന അജീഷിനും മര്‍ദനമേല്‍ക്കുകയായിരുന്നു. ചങ്ങരംകുളം പൊലിസ് കേസെടുത്തു.