എടപ്പാള്‍: എടപ്പാളില്‍ പണിമുടക്കനുകൂലികള്‍ കാര്‍ തകര്‍ത്തു. ഇന്നലെ രാവിലെ പത്തോടെ എടപ്പാള്‍ ജങ്ഷനിലാണ് സമരാനുകൂലികള്‍ രണ്ടു പേര്‍ സഞ്ചരിച്ച കാര്‍ തടഞ്ഞത്. വളാഞ്ചേരിയിലും തൃക്കണാപുരത്തും സമരാനുകൂലികള്‍ കാര്‍നിര്‍ത്താനാവശ്യപെട്ടു നിര്‍ത്തിയില്ലെന്നും സമരാനുകൂലിയുടെ കാലില്‍ തട്ടിയെന്നും ആരോപിച്ചാണ് എടപ്പാളില്‍ കാര്‍ തടഞ്ഞത്.
തര്‍ക്കത്തിനിടയില്‍ പ്രവര്‍ത്തകര്‍ കാറിന്റെ മുന്‍വശത്തെ ചില്ലു തകര്‍ത്തു. വിവരമറിഞ്ഞു ചങ്ങരംകുളത്തു നിന്നും കൂടുതല്‍ പൊലിസെത്തി സ്ഥിതി നിയന്ത്രിച്ചു.
വടകരയില്‍ നിന്നും തിരുവനന്തപുരത്തേക്കു പോകുകയായിരുന്ന സിപിഎമ്മിന്റെ കോട്ടയത്തെ പ്രമുഖ നേതാവിന്റെ ബന്ധുവും സിപിഎമ്മിന്റെ പ്രാദേശിക നേതാവുമായിരുന്നു കാറിലുണ്ടണ്ടായിരുന്നത്. തുടര്‍ന്നു സിപിഎം നേതൃത്വം ഇടപെട്ടു പ്രശ്‌നം ചര്‍ച്ചചെയ്തു പരിഹരിച്ചു.