തലശ്ശേരി: പുതിയ ബസ് സ്റ്റാന്‍ഡില്‍ പെട്രോള്‍ പമ്പിന് സമീപം നിര്‍ത്തിയിട്ട കാറിന് തീപിടിച്ചു. ടെമ്പിള്‍ ഗേറ്റ് ഖദീജ മന്‍സിലില്‍ മന്‍സൂറിന്റെ കാറിനാണ് വ്യാഴാഴ്ച രാത്രി 9.30ന് തീപിടിച്ചത്. ഉടന്‍ ഫയര്‍ഫോഴ്‌സ് എത്തി തീയണച്ചതിനാല്‍ വന്‍ അപകടം ഒഴിവായി. സദാനന്ദപൈ പെട്രോള്‍ പമ്പിന് സമീപത്തെ മേല്‍പ്പാലത്തിന് താഴെ നിര്‍ത്തിയിട്ടതായിരുന്നു കാര്‍. തീപിടിത്തത്തില്‍ കാറിന്റെ മുന്‍ഭാഗം പൂര്‍ണമായി കത്തിനശിച്ചു. കാര്‍ പൊട്ടിത്തെറിച്ച് പെട്രോള്‍ പമ്പിലേക്ക് തീ പടര്‍ന്നിരുന്നെങ്കില്‍ വന്‍ ദുരന്തമുണ്ടാകുമായിരുന്നു. മേല്‍പ്പാലത്തിനടിയില്‍ തള്ളിയ മാലിന്യക്കൂനയ്ക്ക് തീപിടിച്ചായിരിക്കാം കാറിലേക്ക് തീപടര്‍ന്നതെന്ന് ഫയര്‍ഫോഴ്‌സ് ഉദ്യോഗസ്ഥര്‍ പറഞ്ഞു.