ദുബൈ: ലുലു ഗ്രൂപ്പ് സംഘടിപ്പിച്ച ലുലു വാക്കത്തോൺ 2025 ജനസാഗരം തീർത്ത് ചരിത്രമെഴുതി. യു.എ.ഇ പ്രസിഡന്റ് പ്രഖ്യാപിച്ച 'ഇയർ ഓഫ് കമ്മ്യൂണിറ്റി' ആശയത്തിന് പിന്തുണയുമായി ദുബൈ മംസർ പാർക്കിൽ സംഘടിപ്പിച്ച ലുലു വാക്കത്തോണിൽ 23,000ത്തിലധികം പേരാണ് പങ്കെടുത്തത്. സാമൂഹിക സേവനം, സന്നദ്ധ സേവനം എന്നീ ആശയങ്ങള്‍ പങ്കുവച്ച് സാമൂഹിക കാമ്പയിനിന്റെ പ്രാധാന്യം കൈമാറി മൂന്ന് കിലോമീറ്റർ നീണ്ടതായിരുന്നു വാക്കത്തോൺ. 'വാക്ക് ഫോർ ഗ്രീൻ' എന്ന ഹാഷ്ടാഗോടെ സുസ്ഥിരത, ആരോഗ്യകരമായ ജീവിത ശൈലി എന്നീ സന്ദേശങ്ങൾ കൂടി പങ്കു വച്ചായിരുന്നു ലുലു വാക്കത്തോൺ.

മുഖ്യാതിഥിയായി എത്തിയ ചലച്ചിത്ര താരം ആസിഫ് അലി ലുലു വാക്കത്തോണിന്റെ ഫ്ലാഗ് ഓഫ് നിർവഹിച്ചു. അറബ് നടൻ അഹ്മദ് സെയ്ഫ്, ഫിലിപ്പിനോ സെലിബ്രിറ്റി ഒഎംജി-മാർക്ക്, ഫുട്ബോൾ താരം അബ്ദുൽഫെത്ത ബർസാമ എന്നിവരും വാക്കത്തോണിണിന്റെ ഭാഗമായി. നിരവധി സമൂഹ മാധ്യമ താരങ്ങളും കായിക താരങ്ങളും ഉൾപ്പടെ ലുലു വാക്കത്തോണിൽ പങ്കെടുത്തു. ഒത്തൊരുമയുടെ സന്ദേശവുമായി യു.എ.ഇയുടെ സാമൂഹിക വർഷ ആശയത്തിന് കൂടുതൽ കരുത്തു പകരുന്നതാണ് ലുലു വാക്കത്തോൺ എന്നും, ഭാവി തലമുറയ്ക്കായി സുസ്ഥിരതയുടെ പ്രധാന്യം വ്യക്തമാക്കിയുള്ള ലുലുവിന്റെ ചുവടുവെപ്പ് മാതൃകാപരമെന്നും ആസിഫ് അലി പറഞ്ഞു. 
അംഗ വൈകല്യത്തെ അതിജീവിക്കുന്ന വ്യക്തികളും ലുലു വാക്കത്തോണിൽ ഭാഗമായി. ലുലു വാക്കത്തോണിന്റെ പ്രാധാന്യം വ്യക്തമാക്കിയുള്ള ചിത്രങ്ങൾ ഇവർ തത്സമയം വേദിയിൽ വരച്ചത് ഏവരുടെ ഹൃയം കവരുന്നതായി. ഇവരെ പരിപാടിയിൽ പ്രത്യേകം ആദരിക്കുകയും ചെയ്തു. 

യു.എ.ഇയുടെ ഇയർ ഓഫ് കമ്മ്യൂണിറ്റിക്ക് പിന്തുണ നൽകിയുള്ള ലുലു വാക്കത്തോണിന് ലഭിച്ച മികച്ച ജനപങ്കാളിത്തം അഭിമാനകരമാണെന്നും സുസ്ഥിതരതയുടെയും മികച്ച ആരോഗ്യത്തിന്റെയും സന്ദേശം കൂടി എടുത്തു കാട്ടുന്നതാണെന്നും ലുലു ഗ്ലോബൽ ഓപറേഷൻ ഡയരക്ടർ സലിം എം.എ വ്യക്തമാക്കി. സുംബ ഡാൻസ്, എയറോബിക്സ്, യോഗ, ചിൽഡ്രൻസ് ഗെംയിംസ് അടക്കം ആകർഷകമായ പരിപാടികളും സംഘടിപ്പിച്ചിരുന്നു. വാക്കത്തോണിൽ പങ്കെടുത്തവർക്ക് പ്രത്യേകം സമ്മാനങ്ങളും വിതരണം ചെയ്തു.