ദുബായ്: ഐസിസി ചാമ്പ്യൻസ് ട്രോഫിയിലെ ആവേശകരമായ മത്സരത്തിൽ ഇന്ത്യയും പാകിസ്താനും ഏറ്റുമുട്ടികൊണ്ടിരിക്കുകയാണ്. മത്സരത്തിൽ ആദ്യം ബാറ്റ് ചെയ്ത പാക്കിസ്ഥാൻ 241 റൺസാണ് നേടിയത്. ഇന്ത്യ ഇപ്പോൾ ബാറ്റിംഗ് തുടർന്നുകൊണ്ടിരിക്കുകയാണ്. മത്സരത്തിൽ ക്യാപ്റ്റൻ രോഹിത് ശർമ്മ 15 പന്തിൽ 20 റൺസ് നേടിയാണ് മടങ്ങിയത്. മൂന്ന് ഫോറുകളും ഒരു സിക്സുമാണ് ഇന്ത്യൻ ക്യാപ്റ്റൻ നേടിയത്. ഇന്ത്യൻ സ്കോർ 31ൽ നിൽക്കെയാണ് രോഹിത് പുറത്തായത്. ഷഹീൻ അഫ്രീദിയുടെ പന്തിൽ ക്ലീൻ ബൗൾഡായാണ് രോഹിത് മടങ്ങിയത്. 

 

ചെറിയ റൺസിന്‌ രോഹിത് മടങ്ങിയെങ്കിലും ഒരു തകർപ്പൻ നേട്ടം സ്വന്തമാക്കാൻ ഇന്ത്യൻ നായകന് സാധിച്ചു. മത്സരത്തിൽ ഒറ്റ റൺസ് നേടിയപ്പോൾ തന്നെ രോഹിത് ഈ നേട്ടം സ്വന്തമാക്കിയിരുന്നു. ഏകദിനത്തിൽ ഓപ്പണർ എന്ന നിലയിൽ ഏറ്റവും വേഗത്തിൽ 9000 റൺസ് നേടുന്ന താരമായാണ് രോഹിത് മാറിയത്. തന്റെ 181ാം ഇന്നിങ്സിൽ നിന്നുമാണ് രോഹിത് ഈ നേട്ടം സ്വന്തമാക്കിയിരുന്നത്.

ഇതിനു മുമ്പ് ഈ നേട്ടം സ്വന്തമാക്കിയിരുന്നത് ഇതിഹാസ താരം സച്ചിൻ ടെണ്ടുൽക്കർ ആണ്. 197 ഇന്നിങ്സുകളിൽ നിന്നാണ് സച്ചിൻ ഈ റെക്കോർഡ് സ്വന്തമാക്കിയിരുന്നത്. ഏകദിനത്തിൽ ഓപ്പണറായി 9000+ റൺസ് നേടുന്ന ആറാമത്തെ താരം കൂടിയാണ് രോഹിത്. സച്ചിൻ ടെണ്ടുൽക്കർ(15310), സനത് ജയസൂര്യ (12740), ക്രിസ് ഗെയ്ൽ, (10179), ആദം ഗിൽക്രിസ്റ്റ് (9200), സൗരവ് ഗാംഗുലി(9146) എന്നീ താരങ്ങളാണ് രോഹിത്തിന്റെ മുന്നിൽ ഉള്ളത്. 

ആദ്യം ബാറ്റ് ചെയ്ത പാകിസ്താനെ ഇന്ത്യൻ ബൗളർമാർ എറിഞ്ഞുവീഴ്ത്തുകയായിരുന്നു. ബൗളിങ്ങിൽ  കുൽദീപ് യാദവ് മൂന്ന് വിക്കറ്റുകൾ വീഴ്ത്തി മിന്നും പ്രകടനം നടത്തിയപ്പോൾ ഹർദിക് പാണ്ഡ്യ രണ്ട് വിക്കറ്റുകളും നേടി നിർണായകമായി. ഹർഷിത് റാണ, രവീന്ദ്ര ജഡേജ, അക്‌സർ പട്ടേൽ എന്നിവരായിരുന്നു ബാക്കിയുള്ള ഓരോ വിക്കറ്റുകളും നേടിയത്. 

പാക്കിസ്താന് വേണ്ടി അർദ്ധ സെഞ്ച്വറി നേടി സൗത് സക്കീൽ മികച്ച പ്രകടനം നടത്തി. 76 പന്തിൽ 62 റൺസ് ആണ് താരം നേടിയത്. 5 ഫോറുകൾ ആയിരുന്നു താരത്തിന്റെ ബാറ്റിൽ നിന്നും പിറന്നത്. 77 പന്തിൽ 46 റൺസ് നേടി ക്യാപ്റ്റൻ മുഹമ്മദ് റിസ്വാനും 39 പന്തിൽ 38 റൺസ് നേടി കുഷ്ദിൽ ഷായും മികച്ചു നിന്നു.