ലണ്ടൻ: ഇംഗ്ലീഷ് പ്രീമിയർ ലീഗിൽ വീണ്ടും ഗോളടിയിൽ റെക്കോർഡിട്ട് ലിവർപൂളിന്റെ ഈജിപ്ഷ്യൻ സൂപ്പർ താരം മുഹമ്മദ് സലാഹ്. പ്രീമിയർ ലീഗിലെ ത്രില്ലർ പോരാട്ടമായ മാഞ്ചസ്റ്റർ സിറ്റിക്കെതിരെയുള്ള മത്സരത്തിൽ ഗോൾ നേടിയതിനു ശേഷമാണ്‌ സലാഹ് ഈ നേട്ടം സ്വന്തമാക്കിയത്. ഈ സീസണിൽ ഇംഗ്ലീഷ് പ്രീമിയർ ലീഗിൽ സലാഹ് നടത്തുന്ന 40ാം ഗോൾ കോൺട്രിബ്യുഷനായിരുന്നു ഇത്. ഇതിനോടകം തന്നെ 25 ഗോളുകളും 16 അസിസ്റ്റുകളും ആണ് സലാഹ് നേടിയിട്ടുള്ളത്. 

ഈ തകർപ്പൻ പ്രകടനത്തിന് പിന്നാലെയാണ് ഇംഗ്ലീഷ് പ്രീമിയർ ലീഗിൽ മറ്റൊരു താരത്തിനും അവകാശപ്പെടാൻ സാധിക്കാത്ത നേട്ടം സലാഹ് സ്വന്തം പേരിലാക്കി മാറ്റിയത്. ഇംഗ്ലീഷ് പ്രീമിയർ ലീഗിന്റെ ചരിത്രത്തിൽ രണ്ട് വ്യത്യസ്ത സീസണുകളിൽ 40+ ഗോൾ കോണ്ട്രിബ്യുഷൻ നടത്തുന്ന ആദ്യ താരമെന്ന നേട്ടമാണ് സലാഹ് സ്വന്തമാക്കിയത്. ഇതിനുമുമ്പ് 2017-18 സീസണിൽ ആയിരുന്നു സലാഹ് 40+ ഗോൾ കോൺട്രിബ്യുഷൻ നടത്തിയത്. ആ സീസണിൽ 42 ഗോൾ കോൺട്രിബ്യുഷൻ ആയിരുന്നു താരം നേടിയിരുന്നത്. 32 ഗോളുകളും 10 അസിസ്റ്റുകളും ആയിരുന്നു സലാഹ് 2017 സീസണിൽ നേടിയത്.

ഈ സീസണിൽ ഇതിനു മുമ്പും സലാഹ് പല റെക്കോർഡുകളും സ്വന്തമാക്കിയിട്ടുണ്ട്. ഈ സീസണിൽ പ്രീമിയർ ലീഗിൽ 20ലധികം ഗോളുകൾ നേടിയതിന് ശേഷം ഇംഗ്ലീഷ് പ്രീമിയർ ഏറ്റവും കൂടുതൽ തവണ 20+ ഗോളുകൾ നേടുന്ന താരങ്ങളുടെ പട്ടികയിൽ ഇടം പിടിക്കാനും സലാഹിന് സാധിച്ചിരുന്നു.

അഞ്ചു സീസണുകളിലാണ് സലാഹ് 20+ ഗോളുകൾ സ്കോർ ചെയ്തത്. മുൻ ഫ്രഞ്ച് താരം തിയറി ഹെൻറിയും ഇത്ര തന്നെ തവണ ഈ നേട്ടം സ്വന്തമാക്കിയിട്ടുണ്ട്. ആറ് തവണ ഈ നേട്ടം സ്വന്തമാക്കിയ ഹാരി കെയ്ൻ, സെർജിയോ അഗ്യൂറോ എന്നിവരാണ് ഈ നേട്ടത്തിൽ രണ്ടാം സ്ഥാനത്തുള്ളത്. അലൻ ഷിയറാണ് ആണ് ഒന്നാമതും ഉള്ളത്. ഏഴ് തവണയാണ് താരം ഈ നേട്ടം സ്വന്തമാക്കിയത്.