മീനങ്ങാടി: മീനങ്ങാടിയിലെ ശിശുമന്ദിരത്തില്‍ കുരുന്നുകള്‍ പഠിക്കുന്നത് സുരക്ഷയില്ലാത്ത കെട്ടിടത്തിലെന്ന് ആക്ഷേപം. അടിസ്ഥാന സൗകര്യങ്ങളില്ലാത്ത ശിശുമന്ദിരത്തില്‍ കുട്ടികള്‍ക്ക് ഒന്ന് മൂത്രമൊഴിക്കണമെങ്കില്‍ സമീപത്തെ കാട്ടിലേക്കോടണം. ഇഴജന്തുക്കള്‍ താവളമാക്കിയ ഇവിടം ആദ്യ കാലങ്ങളില്‍ മാറിവരുന്ന  പഞ്ചായത്ത് സെക്രട്ടറിമാരുടെ ക്വാര്‍ട്ടേഴ്‌സായി ഉപയോഗിച്ചിരുന്നതാണ്. ഇപ്പോള്‍ കാടുപിടിച്ച് കിടക്കുന്ന ഈ കെട്ടിടത്തോട് ചേര്‍ന്നാണ് ശിശു മന്ദിരത്തിലെ മുപ്പത്തിയഞ്ചോളം വരുന്ന കുരുന്നുകള്‍ വിദ്യനുകരുന്നത്.
ഏതുസമയത്തും ഇഴജന്തുക്കള്‍ ശിശുമന്ദിരത്തിനകത്തും എത്തിപ്പെടാന്‍ ഇടയാക്കുന്ന രീതിയിലാണ് ഇവിടെ കാട് വളര്‍ന്നു പൊങ്ങുന്നത്. ശിശുമന്ദിരത്തിന്റെ പിന്‍വശത്ത് ദുര്‍ഗന്ധത്താല്‍ മൂക്ക് പൊത്തിയേ പോകാന്‍ സാധിക്കൂ. കാട്മൂടിയ ഈ ഭാഗമാണ് പെണ്‍കുട്ടികളുടെ മൂത്രപ്പുര. ഇവിടെ രണ്ട് ടോയ്‌ലറ്റ് ഉള്ളതില്‍ ഒരെണ്ണത്തില്‍ ദുര്‍ഗന്ധം വമിച്ച് ക്ലോസറ്റില്‍ മാലിന്യം നിറഞ്ഞുകിടക്കുകയാണ്. വൃത്തിയുള്ള തലമുറയെ വാര്‍ത്തെടുക്കേണ്ടതിനു പകരം ഗ്രാമപഞ്ചായത്തിന്റെ മൂക്കിന് താഴെയുള്ള ഈ സ്ഥാപനം നല്‍കുന്ന സന്ദേശം മറ്റൊന്നാണ്. 1990ല്‍ സംസ്ഥാനത്തെ പഞ്ചായത്തുകളുടെ പതിനൊന്നിന പരിപാടികളുടെ ഭാഗമായാണ് ശിശുമന്ദിരം ഇവിടെ പ്രവര്‍ത്തനമാരംഭിച്ചത്. കുട്ടികളുടെ ജീവന് തന്നെ ഭീഷണിയുയര്‍ത്തുന്ന  ഇഴജന്തുക്കളുടെ ആവാസകേന്ദ്രമായി മാറിയ സ്റ്റാഫ് ക്വര്‍ട്ടേഴ്‌സും പരിസരവും വൃത്തിയാക്കണമെന്നാണ് ഇപ്പോള്‍ ഉയരുന്ന ആവശ്യം. അധികൃതര്‍ അടിയന്തര നടപടി സ്വീകരിക്കുമെന്ന പ്രതീക്ഷയിലാണ് നാട്ടുകാരും.