കൊച്ചി: റെക്കോർഡുകൾ ഭേദിച്ച് മുന്നേറിയ സ്വർണവില മൂന്നു ദിവസമായ താഴേക്ക്. ഇന്നും വിലയിൽ വൻ ഇടിവാണ് രേഖപ്പെടുത്തിയത്. ഇതോടെ ദിവസങ്ങളുടെ വ്യത്യാസത്തിൽ ആയിരത്തിലേറെ രൂപയുടെ ഇടിവാണ് സ്വർണ വില പവന് രേഖപ്പെടുത്തുന്നത്. 

സ്വർണം വാങ്ങൽ അത്യാവശ്യമായവർക്ക് ഇത് നല്ല വാർത്തയാണ്. അവർക്ക് പെട്ടെന്ന് തന്നെ ആവശ്യം നിറവേറ്റുന്നതിനെ കുറിച്ച് ചിന്തിക്കാം. ഇന്നും ഇന്നലെയുമായി നല്ലൊരു സംഖ്യയാണല്ലോ പവന് മേൽ കുറഞ്ഞിരിക്കുന്നത്. പണിക്കൂലിയിലും ആനുപാതികമായ കുറവ് ലഭിക്കുന്നതോടെ ഉപഭോക്താക്കൾക്ക് താരതമ്യേന വലിയ ഒരാശ്വാസമാണ് ഇത്. അഡ്വാൻസ് ബുക്കിങ്ങും നിങ്ങൾക്ക് ഉപകാരപ്പെടും.

സ്വർണവില ആഗോള വിപണിയിലും കുറവാണ് രേഖപ്പെടുത്തുന്നത്. ഇന്ത്യൻ രൂപയുടെ മൂല്യം കുറഞ്ഞു എന്നതും കാരണമാണ്. അതേസമയം, ക്രൂഡ് ഓയിൽ വില വൻ ഇടിവിൽ നിന്ന് നേരിയ തോതിൽ തിരിച്ചുകയറിയിട്ടുണ്ട്. ക്രിപ്‌റ്റോ കറൻസിയായ ബിറ്റ്‌കോയിൻ വിലയും വൻതോതിൽ ഇടിഞ്ഞതായാണ് കണക്കുകൾ കാണിക്കുന്നത്. അതസമയം, ആഗോള വിപണിയിൽ സ്വർണത്തിന്റെ വിറ്റഴിക്കൽ വൻതോതിൽ നടക്കുന്നതാണ് വില കുറയാൻ കാരണമായി വിദഗ്ധർ ചൂണ്ടിക്കാട്ടുന്നത്. ഉക്രൈന്റഷ്യ യുദ്ധം വൈകാതെ അവസാനിക്കുമെന്ന സൂചന വരുന്നതും ആശ്വാസകരമാണ്.

ഇന്ന് 22 കാരറ്റ് ഒരു പവൻ സ്വർണത്തിന് ഇന്നലെ കേരളത്തിൽ 64,080 രൂപയായിരുന്നു. 320 രൂപയാണ് ഇന്നലെ പവന് കുറഞ്ഞത്.  ഇന്ന് വില വീണ്ടും കുറ‍്ഞ് 63,600 രൂപയിലേക്ക് താഴ്ന്നിരിക്കുകയാണ് സ്വർണവില. ഇന്ന് 480 രൂപയാണ് പവന് മേൽ കുറഞ്ഞത്. ഇന്നലെ ഗ്രാമിന് 40 രൂപ കുറഞ്ഞ് 8010 രൂപയായിരുന്നിടത്ത് ഇന്ന് ഗ്രാമിന്  60 രൂപയാണ് കുറഞ്ഞത്. 7950 രൂപയാണ് ഒരു ഗ്രാം സ്വർണത്തിന്റെ ഇന്നത്തെ വില.

18 കാരറ്റ് സ്വർണം ഗ്രാമിന് 41 രൂപ കുറഞ്ഞ് 6,513 രൂപയായിട്ടുണ്ട്. വെള്ളിയുടെ വില മാറ്റമില്ലാതെ ഗ്രാമിന് 105 രൂപ എന്ന നിരക്കിൽ തുടരുകയാണ്. ഇന്ന് ഒരു പവൻ ആഭരണം വാങ്ങുന്നവർക്ക് പണിക്കൂലി, നികുതി ഉൾപ്പെടെ 69000 വരെ ചെലവ് വന്നേക്കുമെന്നാണ് കണക്കാക്കുന്നത്. 

ഡോളറിനെതിരെ ഇന്ത്യൻ രൂപ കരുത്ത് വർധിപ്പിച്ചാലാണ് സ്വർണവില കുറയുന്നത്. അതിനാൽ ഡോളർരൂപ മൂല്യ വ്യതിയാനം കൂടി പരിശോധിച്ചാണ് കേരളത്തിൽ എല്ലാ ദിവസവും സ്വർണവില നിശ്ചയിക്കുന്നത്.