വയനാട്: മുണ്ടക്കൈ ചൂരല്‍മല ദുരിതബാധിതര്‍ക്കായി 100 വീടുകള്‍ നിര്‍മ്മിച്ചു നല്‍കാന്‍ മുസ്‌ലിം ലീഗ്.ഇക്കാര്യത്തില്‍ ഇനിയും സര്‍ക്കാറിനെ കാത്തു നില്‍ക്കാനാവില്ലെന്നതിന്റെ അടിസ്ഥാനത്തിലാണ് തീരുമാനമെന്നും മുസ്‌ലിം ലീഗ് അഖിലേന്ത്യാ ജനറല്‍ സെക്രട്ടറി പി.കെ കുഞ്ഞാലിക്കുട്ടി അറിയിച്ചു.സ്ഥലം കണ്ടെത്തിക്കഴിഞ്ഞു. സര്‍ക്കാര്‍ തീരുമാനത്തിന് കുറേ കാത്തുനിന്നു. ഇനി കാത്തു നില്‍ക്കാനാവില്ല. റമദാന് ശേഷം വീടുകളുടെ നിര്‍മാണം തുടങ്ങുമെന്ന് പി.കെ. കുഞ്ഞാലിക്കുട്ടി അറിയിച്ചു.

ഈ ആവശ്യത്തിനായി പാര്‍ട്ടി ദേശീയ രാഷ്ട്രീയകാര്യ സമിതി അധ്യക്ഷനും സംസ്ഥാന പ്രസിഡന്റുമായ പാണക്കാട് സാദിഖലി ശിഹാബ് തങ്ങള്‍ ഇന്നലെ വയനാട്ടില്‍ പോയിരുന്നു. വയനാട് ജില്ലാ കമ്മിറ്റിയും പുനരധിവാസത്തിന് നിയോഗിക്കപ്പെട്ട കമ്മിറ്റിയുമായി ചേര്‍ന്ന് കാര്യങ്ങള്‍ നിരീക്ഷിച്ചുമാണ് ഈ തീരുമാനത്തിലെത്തിയതെന്നും അദ്ദേഹം കൂട്ടിച്ചേര്‍ത്തു. 

100 വീടുകള്‍ നിര്‍മിക്കുന്നതിനുള്ള സ്ഥലമാണ് കണ്ടെത്തിയിട്ടുള്ളത്.  സര്‍ക്കാരിന്റെ തീരുമാനം ഞങ്ങള്‍ കുറേ കാത്തിരുന്നതാണ്. വൈകാതെതന്നെ അവിടെ പുനരധിവാസം ഉറപ്പുവരുത്താനാണ് തീരുമാനം. നോമ്പ് കഴിഞ്ഞാലുടനെ വീടുകളുടെ പണി തുടങ്ങുമെന്നും അദ്ദേഹം വ്യക്തമാക്കി. 

മേപ്പാടി പഞ്ചായത്തില്‍ ടൗണിനോട് ചേര്‍ന്നാണ് സ്ഥലം കണ്ടെത്തിയിട്ടുള്ളത്. 1000 സ്‌ക്വയര്‍ ഫീറ്റില്‍ ഭാവിയില്‍ വിപുലീകരിക്കാന് കഴിയുന്ന രീതിയിലുള്ള വീടുകളാണ്  നിര്‍മ്മിക്കുന്നത്. വയനാട് പുനരധിവാസ പദ്ധതിയുമായി ബന്ധപ്പെട്ട് മുസ്‌ലിം ലീഗ് നേതൃത്വത്തില്‍  40 കോടിയിലേറെ രൂപ ശേഖരിച്ചിട്ടുണ്ട്. ഇതില്‍ പണമായി സ്വരൂപിച്ചത് 36,08,11,688 രൂപയും വീടുകള്‍ നിര്‍മിക്കുന്നതിനു സംഭാവനയായി 3,30,00,000 രൂപയുമാണ്. ഇതില്‍ നിന്ന് നേരത്തെ തന്നെ കുടംബങ്ങള്‍ക്ക് അടിയന്തര സഹായങ്ങള്‍ നല്‍കിയിട്ടുണ്ട്. കുടുംബങ്ങള്‍ക്ക് ആവശ്യമായ നിയമ സഹായവും വിദ്യാഭ്യാസ പദ്ധതികളും പാര്‍ട്ടി നടപ്പാക്കുന്നുണ്ട്.