ഫലസ്തീന് ഐക്യദാര്‍ഢ്യം പ്രഖ്യാപിച്ച് നടന്‍ ഗൈ പിയേഴ്‌സ് ഓസ്‌കര്‍ വേദിയില്‍. മികച്ച നടനുള്ള നോമിനേഷന്‍  ലഭിച്ച പിയേഴ്‌സ് തന്റെ കോട്ടില്‍ ഫ്രീ ഫലസ്തീന്‍ പിന്‍ ധരിച്ചു കൊണ്ടാണ് എത്തിയത്. നമുക്ക് ചെയ്യാന്‍ കഴിയുന്ന ഏറ്റവും ചെറിയ കാര്യം എന്നാണ് അദ്ദേഹം തന്റെ പ്രവൃത്തിയെ വിശേഷിപ്പിച്ചത്. 

ഗ്ലാമറിന്റെ മാറ്റുരക്കുന്ന വേദിയില്‍ കൃത്യമായ രാഷ്ട്രീയം പ്രഖ്യാപിച്ചു അദ്ദേഹം. 
'ഫലസ്തീനെ അംഗീകരിക്കുന്നതിലും അതിനെ പിന്തുണക്കുന്നതിലും ഞാന്‍ എപ്പോഴും ഉറച്ചു നില്‍ക്കുകയാണ്. കാരണം അത് അത്രമേല്‍ ആവശ്യമുള്ള ഒന്നാണ്- ആ വേദിയെ സാക്ഷിയാക്കി അദ്ദേഹം പ്രഖ്യാപിച്ചു. 

ഗസ്സക്കുള്ള മുഴുവന്‍ മാനുഷിക സഹായങ്ങള്‍ കൂടി നിര്‍ത്തലാക്കുകയാണെന്ന ഇസ്‌റാഈല്‍ പ്രഖ്യാപനത്തിനിടെയാണ് അദ്ദേഹം തന്റെ നിലപാട് വ്യക്തമാക്കിയിരിക്കുന്നത്. ഹോളിവുഡില്‍ നിരവധി പേര്‍ ഫലസ്തീനെ പിന്തുണച്ച് നേരത്തേയും രംഗത്തെത്തിയിട്ടുണ്ട്. 

ഇത്തവണത്തെ മികച്ച ഡോക്യുമെന്ററിക്കുള്ള ഓസ്‌കര്‍ പുരസ്‌ക്കാരം ലഭിച്ചത് ഫലസ്തീന് മേലുള്ള ഇസ്‌റാഈല്‍ അധിനിവേശം പറയുന്ന 'നോ അദര്‍ലാന്‍ഡ്' നാണ്. 

വെസ്റ്റ്ബാങ്കിലെ ഇസ്‌റാഈലി അധിനിവേശത്തെയാണ് 'നോ അദര്‍ ലാന്‍ഡ്' എന്ന ഡോക്യുമെന്ററി പറയുന്നത്. മസാഫര്‍ യാത്ത എന്ന പ്രദേശത്ത് നിന്ന് ഫലസ്തീനികളെ കുടിയൊഴിപ്പിക്കുന്നതിനെ സംബന്ധിച്ച ഡോക്യുമെന്ററി 20192023 കാലത്ത ചീത്രീകരിച്ചതാണ്. ഫലസ്തീന്‍ ചെറുത്തുനില്‍പിന്റെ നേര്‍ചിത്രമായ ഡോക്യുമെന്ററി തിയറ്ററുകളിലെത്തിക്കാന്‍ ഒരു വിതരണക്കാരനെ പോലും ലഭിച്ചിരുന്നില്ല.
ഫലസ്തീന്‍ മാധ്യമപ്രവര്‍ത്തകനായ ബാസില്‍ അദ്രയും ഇസ്‌റാഈലി മാധ്യമപ്രവര്‍ത്തകനായ യുവാല്‍ അബ്രഹാമും തമ്മിലുള്ള സൗഹൃദം കൂടിയാണ് ഈ ചിത്രം. ബാസില്‍ തന്നെയാണ് ഇതില്‍ അഭിനയിക്കുന്നതും.