എകരൂല്‍: പൊതുതെരഞ്ഞെടുപ്പിന്റെ വിവിധഘട്ടങ്ങള്‍ വിദ്യാര്‍ഥികള്‍ക്ക് പരിചയപ്പെടുത്തി ഇയ്യാട് കിഫായത്തുല്‍ അവാം മദ്‌റസയില്‍ മദ്‌റസാ ലീഡര്‍, സാഹിത്യസമാജം സെക്രട്ടറി സ്ഥാനങ്ങളിലേക്ക് നടന്ന തെരഞ്ഞടുപ്പ് നവ്യാനുഭവമായി. തെരഞ്ഞെടുപ്പ് പ്രഖ്യാപനം, നാമനിര്‍ദേശ പത്രിക സമര്‍പ്പണം, പത്രിക പിന്‍വലിക്കല്‍, പ്രചരണം, ബൂത്ത് ഏജന്റ്, പോളിങ് ഓഫിസര്‍മാര്‍, പ്രിസൈഡിങ് ഓഫിസര്‍മാര്‍ തുടങ്ങിയ തെരഞ്ഞെടുപ്പിലെ എല്ലാ രീതികളുമുണ്ടായിരുന്നു. മദ്‌റസയിലെ മുഴുവന്‍ വിദ്യാര്‍ഥികള്‍ക്കും വോട്ടവകാശവുമുണ്ടായിരുന്നു.
മദ്‌റസാ ലീഡര്‍ സ്ഥാനത്തേക്ക് ഒന്‍പതു സ്ഥാനാര്‍ഥികള്‍ വിവിധ ചിഹ്നങ്ങളിലായി മത്സരിച്ചപ്പോള്‍ സാഹിത്യസമാജം സെക്രട്ടറി സ്ഥാനത്തേക്ക് മൂന്നു പേരായിരുന്നു മത്സരിക്കാനുണ്ടായിരുന്നത്. വിദ്യാര്‍ഥികളുടെ തെരഞ്ഞെടുപ്പ് കാണാന്‍ രക്ഷിതാക്കളും മഹല്ല് കമ്മിറ്റി പ്രധിനിധികളും മറ്റും എത്തിയിരുന്നു. ഫല പ്രഖ്യാപനം ഇന്നു നടക്കും.