ശ്രീകണ്ഠപുരം: മലയോര മേഖലയില്‍ കാര്‍ഷിക വിളകളുടെ വിലത്തകര്‍ച്ചയും, രോഗബാധയും മൂലം റബര്‍, നാളികേര കര്‍ഷകര്‍ തകര്‍ച്ചയുടെ പാതാളക്കുഴിയില്‍.
കിലോക്ക് 250നുമേല്‍ വിലയുണ്ടായിരുന്ന റബറിന് കുത്തനെ ഇടിഞ്ഞ് ഗ്രേഡിന് 125 രൂപയും ലോട്ടിന്  നൂറുമായിട്ട് മാസങ്ങളായി. കടക്കെണിയില്‍ നരകിക്കുന്ന ചെറുകിട കര്‍ഷകര്‍ ഇതോടെ കൂലി കൊടുത്ത് ടാപ്പിങ് ചെയ്യാന്‍ കഴിയാത്ത അവസ്ഥയിലാണ്. ഏറെ പരിശ്രമിച്ച്  സ്വന്തമായി ടാപ്പു ചെയ്താല്‍ തന്നെ പിടിച്ചു നില്‍ക്കാന്‍ കഴിയുന്നില്ല.  
വന്‍കിട കര്‍ഷകരെയും പ്രതിസന്ധി ഏറെ ബാധിച്ചിട്ടുണ്ട്. വിദേശരാജ്യങ്ങളില്‍ നിന്നുള്ള റബര്‍ ഇറക്കുമതി ഇവരെയും കഷ്ടത്തിലാക്കി.  വിലസ്ഥിരതാ പദ്ധതിയുടെ ഭാഗമായി ഏര്‍പ്പെടുത്തിയ സര്‍ക്കാര്‍ സബ്‌സിഡി വല്ലപ്പോഴുമാണ് ലഭിക്കുന്നത്. റബറിന്റെ കാര്യമിതാണെങ്കില്‍ ഇതിനെക്കാള്‍ ശോചനീയമാണ് നാളികേര കര്‍ഷകരുടെ സ്ഥിതി. മണ്ടചീയല്‍ രോഗം വ്യാപകമായതു കാരണം നൂറുകണക്കിന് തെങ്ങുകളാണ് മുറിച്ചു മാറ്റിയത്. പയ്യാവൂര്‍ പഞ്ചായത്തിലെ കുന്നത്തൂര്‍,  ചന്ദനക്കാംപാറ,   ശ്രീകണ്ഠാപുരം പഞ്ചായത്തിലെ  വഞ്ചിയം, ചേപ്പറമ്പ്  എന്നിവടങ്ങളില്‍ നിരവധി തെങ്ങുകള്‍ മുറിച്ചു മാറ്റി. ചിലഗ്രാമപഞ്ചായത്തുകള്‍ സഹായധനമായി അഞ്ഞൂറ് രൂപ നല്‍കുന്നുണ്ടെങ്കിലും ഇതു മുറിച്ചുമാറ്റാനുള്ള കൂലിക്ക് പോലും തികയുന്നില്ല. റബര്‍, നാളികേര കൃഷിക്കാരെക്കാളും പ്രതിസന്ധിയിലാണ് നെല്‍കൃഷിക്കാര്‍. ഇവരില്‍ പലരും കൃഷിയോട് വിടപറഞ്ഞുകൊണ്ടിരിക്കുകയാണ്.