കല്‍പ്പറ്റ: മുണ്ടക്കൈ-ചൂരല്‍മല ദുരന്ത ബാധിതര്‍ക്കായി നിര്‍മ്മിക്കുന്ന ടൗണ്‍ഷിപ്പിന് മുഖ്യമന്ത്രി പിണറായി വിജയന്‍ തറക്കല്ലിട്ടു. കല്‍പ്പറ്റ എല്‍സ്റ്റണ്‍ എസ്റ്റേറ്റില്‍ നടന്ന പരിപാടിയില്‍ പ്രിയങ്ക ഗാന്ധി എംപി, റവന്യൂ മന്ത്രി കെ രാജന്‍, പ്രതിപക്ഷ നേതാവ് വിഡി സതീശന്‍, പികെ കുഞ്ഞാലിക്കുട്ടി എന്നിവര്‍ക്കൊപ്പം എംഎല്‍എമാരും, മത സാംസ്‌കാരിക രംഗത്തെ പ്രമുഖരും പങ്കെടുത്തു. ഉരുള്‍ദുരന്തമുണ്ടായി എട്ട് മാസങ്ങള്‍ക്ക് ശേഷമാണ് ടൗണ്‍ഷിപ്പിന് തറക്കല്ലിടുന്നത്. 

വയനാട് പുനരധിവാസം ലോകത്തിന് മാതൃകയായിരിക്കുമെന്ന് ചടങ്ങ് ഉദ്ഘാടനം ചെയ്ത് സംസാരിക്കവെ മുഖ്യമന്ത്രി പറഞ്ഞു. വീട് നിര്‍മ്മാണത്തോടെ പുനരധിവാസം അവസാനിക്കില്ലെന്നും, ചരിത്രത്തില്‍ രേഖപ്പെടുത്തുന്ന വിധത്തില്‍ പദ്ധതി പൂര്‍ത്തീകരിക്കുമെന്നും അദ്ദേഹം കൂട്ടിച്ചേര്‍ത്തു. 

ഉദ്ഘാടന പ്രസംഗത്തില്‍ കേന്ദ്ര സര്‍ക്കാരിനെതിരെ രൂക്ഷ വിമര്‍ശനമാണ് മുഖ്യമന്ത്രി നടത്തിയത്. സമാനതകളില്ലാത്ത ദുരന്തമാണ് ഉണ്ടായതെന്നും, കേന്ദ്ര സഹായം പ്രതീക്ഷിച്ചെങ്കിലും ഇതുവരെ ഒന്നും നല്‍കിയില്ലെന്നും മുഖ്യമന്ത്രി പറഞ്ഞു. വായ്പ മാത്രമാണ് കേന്ദ്രം അനുവദിച്ചതെന്നും അത് ഇനി തിരിച്ചടക്കേണ്ടതുണ്ടെന്നും മുഖ്യമന്ത്രി പറഞ്ഞു. 

അതേസമയം ഏഴ് സെന്റില്‍ 1000 ചതുരശ്രയടിയിലാണ് ഓരോ വീടുകളും നിര്‍മ്മിക്കുന്നത്. നിലവില്‍ 175 പേര്‍ വീടിന് സമ്മതപത്രം നല്‍കിയിട്ടുണ്ട്. 67 പേര്‍ വീടിന് പകരം നല്‍കുന്ന 15 ലക്ഷം രൂപയുടെ സാമ്പത്തിക സഹായവും സ്വീകരിച്ചു. വീടുകള്‍ക്ക് പുറമെ ആരോഗ്യ കേന്ദ്രം, അങ്കണവാടി, പൊതു മാര്‍ക്കറ്റ്, കമ്മ്യൂണിറ്റി സെന്റര്‍ എന്നിങ്ങനെ സൗകര്യങ്ങളും ഒരുങ്ങും.

cheif minister pinarayi vijayan Lays Foundation Stone for Wayanad Landslide Victims Township today.