അബൂദബി: യാസ് ദ്വീപിലെ ഒരു കെട്ടിട നിർമ്മാണ സ്ഥലത്ത് ഉണ്ടായ തീപിടുത്തം നിയന്ത്രണവിധേയമാക്കിയെന്ന് അധികൃതർ അറിയിച്ചു. ഇന്ന് ഉച്ചയോടെയാണ് യാസ് ദ്വീപിലെ നിർമ്മാണം നടന്നു കൊണ്ടിരിക്കുന്ന ഒരു കെട്ടിടത്തിൽ തീപിടുത്തം ഉണ്ടായത്.

സംഭവത്തിൽ സിവിൽ ഡിഫൻസ് ടീമുകളുമായി സഹകരിച്ച് പ്രവർത്തിക്കുകയാണെന്ന് അബൂദബി പൊലിസ് നേരത്തെ പറഞ്ഞിരുന്നു.  ഇതുസംബന്ധിച്ച് ഔദ്യോഗിക ഉറവിടങ്ങളിൽ നിന്നും ലഭിക്കുന്ന വാർത്തകൾ മാത്രമേ വിശ്വാസിക്കാവൂ എന്ന് അതോറിറ്റി അറിയിച്ചിരുന്നു. സമൂഹമാധ്യമങ്ങളിൽ പ്രചരിച്ചുകൊണ്ടിരിക്കുന്ന ഫോട്ടോകളിലും വീഡിയോകളിലും സ്ഥലത്തെ ഒരു ട്രാക്ക് പോലെ കാണപ്പെടുന്ന ഭാഗത്ത് നിന്ന് വൻതോതിൽ പുക ഉയരുന്നത് കാണാം. യാസ് വാട്ടർവേൾഡിന്റെ നിർമ്മാണത്തിലിരിക്കുന്ന മേഖലയിലാണ് സംഭവം നടന്നതെന്ന് പിന്നീട് സ്ഥിരീകരിച്ചു.

Teams from Abu Dhabi Police and Abu Dhabi Civil Defence Authority have controlled the fire that broke out at a construction site adjacent to Yas Waterworld on Yas Island earlier today, 28 March 2025. The fire did not result in any injuries and has been successfully extinguished,

— شرطة أبوظبي (@ADPoliceHQ) March 28, 2025

അബൂദബി സിവിൽ ഡിഫൻസിന്റെ നിരവധി ഫയർ ട്രക്കുകൾ സ്ഥലത്തെത്തിയാണ് തീ അണച്ചത്. പ്രദേശത്ത് നിന്നും ഉയർന്ന പുകയുടെ അളവ് ഉച്ചകഴിഞ്ഞ് 3.15 ഓടെയാണ് കുറഞ്ഞത്.

2013 ൽ തുറന്ന സന്ദർശക കേന്ദ്രത്തിന്റെ നിർമ്മാണത്തിലിരിക്കുന്ന പ്രദേശത്താണ് തീപിടുത്തമുണ്ടായത്. തീം പാർക്കിന്റെ ഡെവലപ്പറായ മിറൽ, കേന്ദ്രത്തിൽ 16,900 ചതുരശ്ര മീറ്റർ വിസ്തീർണ്ണമുള്ള വികസന പദ്ധതികൾ പ്രഖ്യാപിച്ചിരുന്നു.18 പുതിയ റൈഡുകളും ആകർഷണങ്ങളും കൂടാതെ 3.3 കിലോമീറ്റർ സ്ലൈഡുകളും കൂടി ഉൾപ്പെടുത്തും. യുഎഇയിലെ ഏറ്റവും ഉയരം കൂടിയ സ്ലൈഡ് വാട്ടർപാർക്കിൽ ഇതിൽ ഉൾപ്പെടും. കൂടാതെ വാട്ടർസ്ലൈഡ് സമുച്ചയത്തിനുള്ളിൽ സംയോജിപ്പിച്ചിരിക്കുന്ന ജിസിസിയിലെ ആദ്യത്തെ വാട്ടർപാർക്ക് റൈഡും ഇവിടെയായിരിക്കും വരിക.

തീ അണച്ചതായും ആർക്കും പരുക്കേറ്റിട്ടില്ലെന്നും അബൂദബി പൊലിസ് സോഷ്യൽ മീഡിയയിൽ അറിയിച്ചു.
"യാസ് ദ്വീപിലെ യാസ് വാട്ടർ വേൾഡിനോട് ചേർന്നുള്ള ഒരു നിർമ്മാണ സ്ഥലത്ത് ഇന്ന് രാവിലെ ഉണ്ടായ തീപിടുത്തം അബൂദബി പൊലിസിലെയും അബൂദബി സിവിൽ ഡിഫൻസ് അതോറിറ്റിയിലെയും സംഘങ്ങൾ ചേർന്ന് നിയന്ത്രണവിധേയമാക്കി," പൊലിസ് എക്‌സിൽ പറഞ്ഞു.

തീം പാർക്കിൽ നിന്ന് ഏകദേശം 12 കിലോമീറ്റർ അകലെയുള്ള സായിദ് അന്താരാഷ്ട്ര വിമാനത്താവളത്തിലെ ഉപഭോക്തൃ സേവന സംഘം തീപിടുത്തം തങ്ങളുടെ പ്രവർത്തനങ്ങളെ ബാധിച്ചിട്ടില്ലെന്ന് അറിയിച്ചു.

Fire on Yas Island under control; heavy smoke seen in nearby areas