ചെന്നൈ: ഹാസ്യ പരിപാടിക്കിടെ മഹാരാഷ്ട്ര ഉപമുഖ്യമന്ത്രി ഏക്‌നാഥ് ഷിന്‍ഡെയെ പരിഹസിച്ച സ്റ്റാന്‍ഡപ്പ് കൊമേഡിയന്‍ കുനാല്‍ കമ്രക്ക് മുന്‍കൂര്‍ ജാമ്യം. സംഭവത്തില്‍ പ്രതിഷേധം വ്യാപകമായതോടെ മുംബൈ പൊലിസ് കുനാലിന് രണ്ടുതവണ സമന്‍സ് അയച്ചിരുന്നു. ഇതിന് പിന്നാലെയാണ് കുനാല്‍ കമ്ര മദ്രാസ് ഹൈക്കോടതിയെ സമീപിച്ചത്. ഇടക്കാല ജാമ്യം അനുവദിച്ച കോടതി കേസ് ഏപ്രില്‍ 7 ലേക്ക് മാറ്റുകയും ചെയ്തു. 

മുംബൈയിലെ ഹാബിറ്റാറ്റ് കോമഡി ക്ലബ്ബില്‍ നടത്തിയ പരിപാടിയില്‍ കുനാല്‍ ഏക്‌നാഥ് ഷിന്‍ഡെയെ രാജ്യദ്രോഹിയെന്ന് വിളിച്ചെന്നാണ് ആരോപണം. 'ദില്‍ തോ പാഗല്‍ ഹെ' എന്ന ബോളിവുഡ് സിനിമയിലെ പാട്ടിന്റെ പാരഡി രൂപത്തിലാണ് കുനാല്‍ ഭരണകക്ഷിയെ പരിഹസിച്ചത്. ഇതിന് പിന്നാലെ പരിപാടി നടന്ന ഹോട്ടല്‍ ശിവസേന പ്രവര്‍ത്തകര്‍ അടിച്ച് തകര്‍ക്കുകയും ചെയ്തു. 

കേന്ദ്ര സര്‍ക്കാരിനെതിരെ ഇതിന് മുന്‍പും വിമര്‍ശനങ്ങള്‍ നടത്തിയ വ്യക്തിയാണ് കുനാല്‍. ഇതിന്റെ പേരില്‍ നിരവധി ഭീഷണികളും താരത്തിന് ലഭിച്ചിട്ടുണ്ട്. 

അതേസമയം പരാമര്‍ശത്തില്‍ മാപ്പ് പറയില്ലെന്ന നിലപാടിലാണ് കുനാല്‍. ആവിശ്കാര സ്വാതന്ത്ര്യമാണ് താന്‍ വിനിയോഗിച്ചതെന്നും, അതിന് മാപ്പ് പറയേണ്ട ആവശ്യമില്ലെന്നും കുനാല്‍ പറഞ്ഞു. മാത്രമല്ല പൊലിസിനോടും, കോടതിയോടും താന്‍ സഹകരിക്കുമെന്നും അദ്ദേഹം കൂട്ടിച്ചേര്‍ത്തു. 

കുനാലിനെതിരായ സംഘപരിവാര്‍ ആക്രമണത്തില്‍ രാജ്യവ്യാപകമായി പ്രതിഷേധം ഉയരുകയാണ്. പ്രതിപക്ഷ കക്ഷികള്‍ കുനാലിന് പിന്തുണയുമായി രംഗത്തെത്തിയിട്ടുണ്ട്.

 Comedian Kunal Kamra has been granted anticipatory bail by the Madras High Court after facing protests for mocking Maharashtra Deputy Chief Minister Eknath Shinde during a stand-up show. The case has been postponed to April 7, following two summons issued by the Mumbai police.