ചെന്നൈ: ഐപിഎല്ലിലെ ത്രില്ലർ പോരാട്ടത്തിൽ ചെന്നൈ സൂപ്പർ കിങ്‌സും റോയൽ ചലഞ്ചേഴ്‌സ് ബെംഗളൂരുവും തമ്മിലുള്ള മത്സരം നടക്കുകയാണ്.  ചെന്നൈയുടെ തട്ടകമായ എംഎ ചിദംബരം സ്റ്റേഡിയത്തിൽ നടക്കുന്ന മത്സരത്തിൽ ടോസ് നഷ്ടപ്പെട്ട് ആദ്യം ബാറ്റ് ചെയ്ത ബെംഗളൂരു 20 ഓവറിൽ ഏഴ് വിക്കറ്റ് നഷ്ടത്തിൽ 196 റൺസാണ് നേടിയത്. 

ക്യാപ്റ്റൻ രജത് പടിദാറിന്റെ അർദ്ധ സെഞ്ച്വറി കരുത്തിലാണ് ആർസിബി മികച്ച സ്കോർ നേടിയത്. 32 പന്തിൽ 51 റൺസാണ് പടിദാർ നേടിയത്. നാല് ഫോറുകളും മൂന്ന് സിക്സുകളുമാണ്‌ ആർസിബി ക്യാപ്റ്റൻ നേടിയത്. ഇതോടെ ഒരു തകർപ്പൻ നേട്ടവും ആർസിബി ക്യാപ്റ്റൻ കൈവരിച്ചു.  ചെന്നൈയിൽ 50+ റൺസ് നേടുന്ന രണ്ടാമത്തെ ആർസിബി ക്യാപ്റ്റനാവാനും പടിദാറിന് സാധിച്ചു. 2013ൽ വിരാട് കോഹ്‌ലിയായിരുന്നു ആദ്യമായി ചെന്നൈയിൽ അർദ്ധ സെഞ്ച്വറി നേടിയ ആർസിബി ക്യാപ്റ്റൻ. 58 റൺസാണ് കോഹ്‌ലി 2013ൽ നേടിയിരുന്നത്. 

മത്സരത്തിൽ ആർസിബി ക്യാപ്റ്റന് പുറമേ ഫിൽ സാൾട്ട് 16 പന്തിൽ 32 റൺസും വിരാട് കോഹ്‌ലി 30 പന്തിൽ 31 റൺസും നേടി മികച്ച ടോട്ടൽ പടുത്തുയർത്തുന്നതിൽ നിർണായകമായി. ചെന്നൈ സൂപ്പർ കിങ്‌സ് ബൗളിങ്ങിൽ നൂർ അഹമ്മദ് മൂന്ന് വിക്കറ്റും മതീഷ പതിരാണ രണ്ട് വിക്കറ്റുകളും വീഴ്ത്തി തിളങ്ങി. ഖലീൽ മുഹമ്മദ്, ആർ അശ്വിൻ എന്നിവർ ഓരോ വീതം വിക്കറ്റും നേടി.

റോയൽ ചലഞ്ചേഴ്‌സ് ബെംഗളൂരു പ്ലെയിങ് ഇലവൻ

രജത് പതിദാർ (ക്യാപ്റ്റൻ), വിരാട് കോഹ്‌ലി, ഫിൽ സാൾട്ട്, ദേവദത്ത് പടിക്കൽ, ജിതേഷ് ശർമ്മ (വിക്കറ്റ് കീപ്പർ), ലിയാം ലിവിംഗ്‌സ്റ്റൺ, ടിം ഡേവിഡ്, ക്രുനാൽ പാണ്ഡ്യ, ജോഷ് ഹേസിൽവുഡ്, റാസിഖ് സലാം, സുയാഷ് ശർമ്മ, യാഷ് ദയാൽ, ഭുവനേശ്വർ കുമാർ.

 ചെന്നൈ സൂപ്പർ കിംഗ്‌സ് പ്ലെയിങ് ഇലവൻ

രചിൻ രവീന്ദ്ര, രാഹുൽ ത്രിപാഠി, റുതുരാജ് ഗെയ്‌ക്‌വാദ് (ക്യാപ്റ്റൻ, ശിവം ദുബെ, ദീപക് ഹൂഡ, സാം കറൻ, രവീന്ദ്ര ജഡേജ, എംഎസ് ധോണി (വിക്കറ്റ് കീപ്പർ), രവിചന്ദ്രൻ അശ്വിൻ, നൂർ അഹമ്മദ്, ഖലീൽ അഹമ്മദ്, മതീഷ പതിരാണ.

Rajat Patidar Create a Great Record against Chennai super kings in ipl