തിരുവനന്തപുരം: സംസ്ഥാനത്ത് ഓപ്പറേഷൻ ഡി ഹണ്ടിന്റെ ഭാഗമായി നടത്തിയ സ്പെഷ്യൽ പരിശോധനയിൽ മയക്കുമരുന്ന് വിൽപ്പന നടത്തുന്ന 2128 ആളുകളെ പരിശോധനക്ക്‌ വിധേയമാക്കി. വ്യത്യസ്ത തരത്തിലുള്ള നിരോധിക്കപ്പെട്ട മയക്കുമരുന്ന് കൈവശം വെച്ചതിന് 117 കേസുകളാണ് രജിസ്റ്റർ ചെയ്തത്.

സംഭവത്തിൽ 128 ആളുകളാണ് അറസ്റ്റ് ചെയ്യപ്പെട്ടത്. ഇന്നലെയാണ് ഓപ്പറേഷൻ ഡി ഹണ്ടിന്റെ ഭാഗമായി പരിശോധന നടത്തിയത്. കേസുകളിൽ പിടിക്കപ്പെട്ട മയക്കുമരുന്നുകളായ എംഡിഎംഎ 0.42 ഗ്രാമും കഞ്ചാവ് 3.231 ഗ്രാമുമാണ്‌ പിടിച്ചെടുത്തത്. ഇതിന് പുറമെ 81 കഞ്ചാവ് ബീഡിയും പിടിച്ചെടുത്തു.

നിരോധിക്കപ്പെട്ട മയക്കുമരുന്നുകളുടെ സംഭരണത്തിലും വിപണനത്തിലും ഏർപ്പെടുന്ന ആളുകളെ കണ്ടുപിടിച്ച് നിയമ നടപടികൾ സ്വീകരിക്കുന്നതിനു വേണ്ടിയാണ് സംസ്ഥാനത്ത് വ്യാപകമായി ഓപ്പറേഷൻ ഡി ഹണ്ട് നടത്തുന്നത്.

പൊതുജനങ്ങളിൽ നിന്നും മയക്കുമരുന്ന് സംബന്ധിച്ചുള്ള വിവരങ്ങൾ സ്വീകരിച്ചു നടപടികൾ കൈക്കൊള്ളുന്നതിന് വേണ്ടി 24 മണിക്കൂറും പ്രവർത്തിക്കുന്ന ആന്റി നർക്കോട്ടിക്  കൺട്രോൾ റൂം പ്രവർത്തിക്കുന്നുണ്ട്. 9497927797 എന്ന നമ്പറിലാണ് ബന്ധപ്പെടേണ്ടത്. ഈ നമ്പറിൽ വിളിക്കുന്നവരുടെ വിവരങ്ങൾ രഹസ്യമായി സൂക്ഷിക്കും.

Operation D-Hunt 128 people arrested in widespread searches across the state