കൊച്ചി: കേബിള്‍ കുരുങ്ങി വീണ്ടും അപകടം. എറണാകുളം കറുകപ്പള്ളിയിലാണ് സംഭവം. വിദ്യാര്‍ഥി സഞ്ചരിച്ചിരുന്ന സൈക്കിളിന്റെ ഹാന്‍ഡിലില്‍ കേബിള്‍ കുരുങ്ങിയാണ് അപകടമുണ്ടായത്. അപകടത്തില്‍ വിദ്യാര്‍ഥിയുടെ വിരല്‍ അറ്റുപോയി. കറുകപ്പള്ളി സ്വദേശി അബുള്‍ ഹസന്‍ എന്ന വിദ്യാര്‍ഥിക്കാണ് അപകടത്തില്‍ പരുക്കേറ്റത്. അറ്റുപോയ കൈവിരല്‍ പിന്നീട് ശസ്ത്രക്രിയയിലൂടെ തുന്നി ചേര്‍ത്തു.

ഇതാദ്യമായല്ല കേബിള്‍ കുരുങ്ങി അപകടമുണ്ടാകുന്നത്. കഴിഞ്ഞ ദിവസം കൊല്ലം ജില്ലയിലെ കരുനാഗപ്പള്ളിയിലും കേബിള്‍ കുരുങ്ങിയുണ്ടായ അപകടത്തില്‍ സന്ധ്യ എന്ന വീട്ടമ്മയ്ക്ക് ഗുരുതരമായി പരുക്കേറ്റിരുന്നു. തടി കയറ്റിവന്ന ലോറി തട്ടി കേബിള്‍ പൊട്ടി താഴെ വീഴുകയായിരുന്നു. ഭര്‍ത്താവിന്റെ വര്‍ക് ഷോപ്പിന് മുന്നില്‍ സ്‌കൂട്ടറില്‍ ഇരിക്കുകയായിരുന്ന സന്ധ്യ കേബിളില്‍ കുരുങ്ങി, 20 മീറ്ററോളം ദൂരം തെറിച്ചു വീണു. സ്‌കൂട്ടര്‍ ഉയര്‍ന്നു പൊങ്ങി സന്ധ്യയുടെ ദേഹത്തേക്ക് വീണ് പരുക്കേല്‍ക്കുകയായിരുന്നു. വീട്ടമ്മുടെ തോളിനാണ് പരുക്കേറ്റത്.