മലപ്പുറം: സാമ്പത്തികമായി പിന്നാക്കം നിൽക്കുന്ന വിദ്യാർഥികൾക്കുള്ള കേന്ദ്രാവിഷ്‌കൃത പദ്ധതി നാഷനൽ മീൻസ് കം മെറിറ്റ് സ്‌കോളർഷിപ്പിന് (എൻ.എം.എം.എസ്) വ്യത്യസ്ഥ കട്ടോഫ് മാർക്ക് പ്രഖ്യാപിച്ചത് വിദ്യാർഥികൾക്ക് തിരിച്ചടിയായി.സംസ്ഥാന തലത്തിൽ ഒരേ ചോദ്യപേപ്പർ ഉപയോഗിച്ച് പരീക്ഷ എഴുതിയ കുട്ടികളിൽ നിന്ന് വിജയികളെ കണ്ടെത്താനാണ് ജില്ലാതലത്തിൽ വ്യത്യസ്ത കട്ട് ഓഫ് മാർക്ക് നിശ്ചയിച്ചത്. സംസ്ഥാനത്ത് ആകെ 3473 പേർക്കാണ് സ്‌കോളർഷിപ്പ് ലഭിക്കുന്നത്.

ജില്ലകളിലെ ജനസംഖ്യയും പരീക്ഷാർഥികളുടെ എണ്ണവും പരിഗണിക്കാതെയാണ് 14 ജില്ലകൾക്കും വ്യത്യസ്ഥ കട്ട് ഓഫ് മാർക്ക് നിശ്ചയിച്ചിരിക്കുന്നത്. ആകെ 180 മാർക്കിനാണ് പരീക്ഷ. ഇതിൽ ശരാശരിക്ക് മുകളിൽ 112 മാർക്ക് ലഭിച്ച കോട്ടയത്ത് പരീക്ഷ എഴുതിയ കുട്ടികൾ സ്‌കോളർഷിപ്പിന് അർഹത നേടിയപ്പോൾ മലപ്പുറം ജില്ലയുടെ കട്ട് ഓഫ് 141 ആണ്. 140 മാർക്ക് വരെ ലഭിച്ച കുട്ടികൾക്ക് പോലും മലപ്പുറത്ത് സ്‌കോളർഷിപ്പിന് അർഹതയില്ല. മലപ്പുറം ജില്ലയോട് ചേർന്ന് കിടക്കുന്ന പാലക്കാട് ജില്ലയിലെ  കുട്ടികളുടെ കട്ട് ഓഫ് മാർക്ക് 129 ആണ്. മലപ്പുറം, കോഴിക്കോട്, കണ്ണൂർ ജില്ലകളിലാണ് കട്ട് ഓഫ് മാർക്ക് കൂടുതൽ. വിവേചനത്തെ തുടർന്ന് ഇവിടങ്ങളിലാണ് കൂടുതൽ പേർ സ്കോളർഷിപ്പിന് അനർഹരായത്. 

കൂടുതൽ കുട്ടികൾ പരീക്ഷ എഴുതിയ ജില്ലകളിലെ ഏറ്റവും മികച്ച പഠന നിലവാരമുള്ള വിദ്യാർഥികൾക്ക് സ്‌കോളർഷിപ്പ് ലഭിക്കാതിരിക്കുകയും കുറച്ച് കുട്ടികൾ പരീക്ഷ എഴുതിയ ജില്ലകളിലെ ശരാശരി പഠന നിലവാരമുള്ളവർക്ക് സ്‌കോളർഷിപ്പിന് അർഹത ലഭിക്കുകയും ചെയ്തു. ഈ വിവേചനത്തിനെതിരേ വ്യാപക പ്രതിഷേധമുയർന്നിട്ടുണ്ട്. സംസ്ഥാനത്തെ ഒരു യൂനിറ്റായി കണ്ട് കട്ട് ഓഫ് നിശ്ചയിക്കണമെന്നാണ് വിദ്യാർഥികളുടേയും രക്ഷിതാക്കളുടേയും ആവശ്യം.

എട്ടാം ക്ലാസ് വിദ്യാർഥികൾക്കായാണ് എൻ.എം.എം.എസ് പരീക്ഷ നടത്തി അർഹരായവരെ കണ്ടെത്തുന്നത്. സർക്കാർ, എയ്ഡഡ് സ്‌കൂളുകളിലെ സാമ്പത്തികമായി പിന്നാക്കം നിൽക്കുന്ന വിദ്യാർഥികൾക്കാണ് സ്‌കോളർഷിപ്പ്. രക്ഷിതാക്കളുടെ വാർഷിക വരുമാനം 3,50,000 രൂപയ്ക്ക് താഴെയായിരിക്കണം. അർഹരായ വിദ്യാർഥികൾക്ക് പ്ലസ് ടു വരെ വർഷത്തിൽ 12,000 രൂപ സ്‌കോളർഷിപ്പ് ലഭിക്കും. എട്ടാം ക്ലാസിലെ കൊഴിഞ്ഞുപോക്ക് തടയുന്നതിനും സെക്കൻഡറി വിദ്യാഭ്യാസം പ്രോത്സാഹിപ്പിക്കുന്നതിനുമാണ് സ്‌കോളർഷിപ്പ്  ലക്ഷ്യംവയ്ക്കുന്നത്.

Discrimination in NMMS Scholarships Different cut off marks to find the winners