കൊച്ചി: ജബല്‍പൂരില്‍ മലയാളി വൈദികനെയും സംഘത്തെയും ബജ്‌റംഗ്ദൾ പ്രവര്‍ത്തകര്‍ ആക്രമിച്ച സംഭവത്തില്‍ മാധ്യമങ്ങള്‍ ഉന്നയിച്ച ചോദ്യങ്ങളോട് ആക്രോശിച്ച് കേന്ദ്ര സഹമന്ത്രി സുരേഷ് ഗോപി. ഉത്തരം പറയാന്‍ സൗകര്യമില്ലെന്നും ചോദ്യങ്ങള്‍ സി.പി.എം രാജ്യസഭാ എം.പിയായ ജോണ്‍ ബ്രിട്ടാസിന്റെ വീട്ടില്‍ വച്ചാല്‍ മതിയെന്നും സഹമന്ത്രി പറഞ്ഞു. നിങ്ങള്‍ ആരാണ്, നിങ്ങള്‍ ആരോടാണ് ചോദ്യങ്ങള്‍ ചോദിക്കുന്നതെന്നും മാധ്യമങ്ങള്‍ ആരാണെന്നും സുരേഷ് ഗോപി ആക്രോശിച്ചു.നെടുമ്പാശ്ശേരി വിമാനത്താവളത്തിൽ വച്ചായിരുന്നു മന്ത്രിയുടെ മര്യാദ മറന്ന പെരുമാറ്റം.

ചോദ്യം ഉന്നയിച്ചത് കൈരളി ചാനൽ റിപ്പോർട്ടർ ആണെന്ന് ചോദിച്ച് മനസിലാക്കിയ ശേഷം, അതൊക്കെ ബ്രിട്ടാസിൻ്റെ വീട്ടിൽ വച്ചാൽ മതിയെന്നും മന്ത്രി മാധ്യമപ്രവർത്തകനു നേരെ വിരൽചൂണ്ടി പറഞ്ഞു. ഇതോടെ മാധ്യമപ്രവർത്തകർ ഒന്നടങ്കം തങ്ങൾ എല്ലാവരുടെയും ചോദ്യമാണ് ഇതെന്നും പ്രസക്തമായ ചോദ്യമാണെന്നും ചൂണ്ടിക്കാണിക്കുകയായിരുന്നു. ഇതിനു മറുപടി പറയാൻ സൗകര്യമില്ലെന്നു പറഞ്ഞ്, മന്ത്രി ഒഴിഞ്ഞുമാറുകയായിരുന്നു.

Union Minister of State Suresh Gopi shouted at the questions raised by the media regarding the attack on a Malayali priest and his team in Jabalpur by Bajrang Dal workers