സോള്‍: ദക്ഷിണ കൊറിയയില്‍ ഏറ്റവും വലിയ മയക്കുമരുന്നു വേട്ട. രണ്ടു ടണ്‍ കൊക്കെയ്ന്‍ ആണ് പിടികൂടിയത്. നോര്‍വീജിയന്‍ പതാകയുള്ള കപ്പലിലാണ് ലഹരി പിടികൂടിയത്. ദക്ഷിണ കൊറിയയുടെ ചരിത്രത്തിലെ ഏറ്റവും വലിയ ലഹരിവേട്ടയാണിത്. കൊറിയന്‍ തീരസംരക്ഷണ സേനയാണ് കൊക്കെയ്ന്‍ പിടിച്ചെടുത്തത്. മെക്‌സികോയില്‍ നിന്ന് പുറപ്പെട്ടതാണ് കപ്പല്‍. ഇക്വഡോര്‍, പാനമ, ചൈന എന്നിവിടങ്ങളിലേക്കാണ് കപ്പല്‍ യാത്ര ചെയ്യേണ്ടിയിരുന്നത്.

യു.എസ് ഏജന്‍സികളില്‍ നിന്ന് ലഭിച്ച ഇന്റലിജന്‍സ് വിവരത്തിന്റെ പശ്ചാത്തലത്തിലാണ് ദ.കൊറിയന്‍ അധികൃതര്‍ തിരച്ചില്‍ നടത്തിയത്. കപ്പലില്‍ മയക്കുമരുന്നുകള്‍ വരുന്നുവെന്ന എഫ്.ബി.ഐയുടെയും ഹോംലാന്റ് സെക്യൂരിറ്റി ഇന്‍വെസ്റ്റിഗേഷന്‍സിന്റെയും വിവരത്തെ തുടര്‍ന്നായിരുന്നു പരിശോധന.

സ്‌നിഫര്‍ ഡോഗുകളുടെ സഹായത്തോടെ 90 ഓഫിസര്‍മാരാണ് പരിശോധന നടത്തിയതെന്ന് കൊറിയന്‍ തീരസംരക്ഷണ സേന അറിയിച്ചു. ദക്ഷിണ കൊറിയന്‍ കിഴക്കന്‍ തീരത്ത് നങ്കൂരമിട്ട ശേഷമായിരുന്നു പരിശോധന. കപ്പലിന്റെ എന്‍ജിന്‍ റൂമിനോട് ചേര്‍ന്നുള്ള ഭാഗത്തെ രഹസ്യ അറയിലാണ് ലഹരി വസ്തുക്കള്‍ ഒളിപ്പിച്ചിരുന്നത്. 40 കിലോ ഭാരമുള്ള 56 ചാക്കുകളിലായാണ് കൊക്കെയ്ന്‍ ഉണ്ടായിരുന്നത്. നേരത്തെ കൊറിയയില്‍ 404 കിലോഗ്രം മെത്തആംഫിറ്റാമിന്‍ പിടികൂടിയ റെക്കോര്‍ഡാണ് തിരുത്തിയതെന്ന് കൊറിയന്‍ കസ്റ്റംസ് സര്‍വിസ് ഉദ്യോഗസ്ഥര്‍ അറിയിച്ചു. 697 ദശലക്ഷം ഡോളറിന്റെ വിപണിമൂല്യമുള്ളതാണ് പിടികൂടിയ രാസലഹരി.

South Korea seize two tons of cocaine in largest-ever drug bust