തിരുവനന്തപുരം: മാസപ്പടി കേസിൽ പ്രതിയായ മുഖ്യമന്ത്രി പിണറായി വിജയന്റെ മകൾ വീണയ്ക്ക് സംരക്ഷണ കവചമൊരുക്കി പി.ബി അംഗം പ്രകാശ് കാരാട്ടും പാർട്ടി സംസ്ഥാന ഘടകവും. എന്നാൽ, വ്യക്തിപരമായ കേസുകൾ പാർട്ടി അക്കൗണ്ടിൽ കൊണ്ടുവരേണ്ടെന്ന നിലപാടിലാണ് ഒരുവിഭാഗം ദേശീയ നേതാക്കൾ. മധുരയിൽ പാർട്ടി കോൺഗ്രസ് നടക്കുന്നതിനിടെയാണ് ഇടിത്തീപോലെ എസ്.എഫ്.ഐ.ഒ വീണയെ പ്രതിയാക്കി കോടതിയിൽ കുറ്റപത്രം സമർപ്പിച്ചത്. 

പാർട്ടി കോൺഗ്രസ് നടക്കുന്നതിനിടെ ഇതിന് അനുമതി കൊടുത്തത് മുഖ്യമന്ത്രിയെ ലക്ഷ്യമിട്ടാണെന്നും തെളിവുകളുണ്ടെങ്കിൽ പുറത്തുവിടട്ടെ, അപ്പോൾ ചർച്ച നടത്താമെന്നുമാണ് കേന്ദ്ര നേതൃത്വത്തിന്റെ നിലപാട്. പിണറായിയെ ലക്ഷ്യംവച്ചാണ് ഈ നീക്കമെന്നാണ് പ്രകാശ് കാരാട്ട് ആരോപിക്കുന്നത്. പിണറായിക്കെതിരായ നീക്കത്തെ രാഷ്ട്രീയമായും നിയമപരമായും നേരിടുമെന്ന് പ്രകാശ് കാരാട്ട് മധുരയിൽ പറഞ്ഞു. വീണാ വിജയനെ പ്രോസിക്യൂട്ട് ചെയ്യാനുള്ള അനുമതി ഗൗരവതരമല്ലെന്ന നിലപാടിലാണ് സി.പി.എം. മുഖ്യമന്ത്രിയെ കടന്നാക്രമിക്കാനുള്ള രാഷ്ട്രീയ ലക്ഷ്യത്തോടെയുള്ള നീക്കമാണ് നടക്കുന്നതെന്ന് സി.പി.എം സംസ്ഥാന സെക്രട്ടറി എം.വി ഗോവിന്ദനും പറഞ്ഞു. രാഷ്ട്രീയ നീക്കം രാഷ്ട്രീയമായി നേരിടുമെന്ന് പറഞ്ഞ ഗോവിന്ദൻ, കൈക്കൂലിക്ക് ആരെങ്കിലും ടാക്‌സ് അടക്കുമോയെന്നും ചോദിച്ചു.  

എസ്.എഫ്.ഐ.ഒ നടപടിയിൽ ഗൂഢാലോചന സംശയിക്കണമെന്ന് പോളിറ്റ് ബ്യൂറോ അംഗം എം.എ ബേബിയും പ്രതികരിച്ചു. രാഷ്ട്രീയപ്രേരിതമായ കേസാണിതെന്ന് ധനമന്ത്രി കെ.എൻ ബാലഗോപാൽ കുറ്റപ്പെടുത്തി. പാർട്ടി കോൺഗ്രസ് സമയത്ത് രാഷ്ട്രീയ പ്രേരിതമായ കാര്യങ്ങൾ ചെയ്യുന്നുവെന്നായിരുന്നു സംസ്ഥാന സെക്രട്ടേറിയറ്റ് അംഗം കെ.കെ ശൈലജയുടെ പ്രതികരണം. പൊതുസമൂഹം മാത്രമല്ല, കോടതിയും ക്ലീൻചിറ്റ് നൽകിയ കേസാണിതെന്ന് മന്ത്രി പി. രാജീവ് പറഞ്ഞു.അതേസമയം, വിഷയത്തിൽ പ്രതികരിക്കാൻ മന്ത്രി മുഹമ്മദ് റിയാസ് തയാറായില്ല. 
ചർച്ചകൾ ഒന്നും ഇല്ലാതെ ഒറ്റക്കെട്ടായി പിണറായിക്ക് പ്രതിരോധം തീർക്കുകയാണ് പാർട്ടിയുടെ കേന്ദ്ര, സംസ്ഥാന നേതൃത്വം. സി.പി.എം സംസ്ഥാന സെക്രട്ടറിയായിരുന്ന കോടിയേരി ബാലകൃഷ്ണന്റെ മകൻ ബിനീഷ് കോടിയേരിക്കെതിരേ ഇ.ഡി നടപടിയെടുത്തപ്പോൾ അതിനെ പ്രതിരോധിക്കാൻ സി.പി.എം തയാറായിരുന്നില്ല. 

Prakash Karat and the state unit of the party have provided protection to Veena Vijayan