ചെന്നൈ: ഐ.പി.എല്ലിൽ ഇന്ന് രണ്ട് മത്സരങ്ങൾ. സീസണിലെ രണ്ടാം ജയം തേടി ഇറങ്ങുന്ന ചെന്നൈ സൂപ്പർ കിങ്സും ഡൽഹി ക്യാപിറ്റൽസും തമ്മിലാണ് ഇന്നത്തെ ആദ്യ മത്സരം. രാത്രി 7.30ന് നടക്കുന്ന രണ്ടാം മത്സരത്തിൽ പഞ്ചാബും രാജസ്ഥാനും തമ്മിലാണ് പോരാട്ടം. സീസണിൽ മൂന്ന് മത്സരം പൂർത്തിയാക്കിയ ചെന്നൈ രണ്ട് മത്സരത്തിൽ തോൽവി നേരിട്ടപ്പോൾ ഒറ്റ മത്സരത്തിൽ മാത്രമേ ജയിച്ചിട്ടുള്ളു. അതിനാൽ ജയത്തോടെ ആത്മവിശ്വാസം തിരിച്ചുപിടിക്കാൻ വേണ്ടിയാണ് ചെന്നൈ സംഘം ഇറങ്ങുന്നത്.

അവസാനമായി രാജസ്ഥാനെതിരെയായിരുന്നു ചെന്നൈ കളിച്ചത്. അന്ന് പൊരുതി നോക്കിയെങ്കിലും ആറു റൺസിന്റെ തോൽവിയാണ് ചെന്നൈ നേരിട്ടത്. അതേസമയം ഡൽഹിയാകട്ടെ കളിച്ച രണ്ട് മത്സരത്തിലും ജയിച്ചാണ് എത്തുന്നത്. ആദ്യ മത്സരത്തിൽ ലഖ്നൗവിനെ ഒരു വിക്കറ്റിന് തോൽപ്പിച്ച ഡൽഹി രണ്ടാം മത്സരത്തിൽ സൺറൈസേഴ്സ് ഹൈദരാബാദിനെയും തോൽപ്പിച്ചു. ഹൈദരാബാദിനെതിരെ ഏഴു വിക്കറ്റിൻ്റെ ജയമായിരുന്നു നേടിയത്. രണ്ടിൽ രണ്ടും ജയിച്ച ഡൽഹിക്ക് നാലു പോയിന്റാണുള്ളത്. രാത്രി 7.30ന് നടക്കുന്ന രണ്ടാം മത്സരത്തിൽ രാജസ്ഥാൻ പഞ്ചാബിനെയാണ് നേരിടുന്നത്.

കളിച്ച രണ്ടിലും ജയിച്ച പഞ്ചാബ് മികച്ച ഫോമിലാണ്. ആദ്യ മത്സരത്തിൽ 11 റൺസിന്‌ ഗുജറാത്തിനെ തോൽപ്പിച്ച പഞ്ചാബ് രണ്ടാം മത്സരത്തിൽ ലഖ്‌നൗവിനേയും വീഴ്ത്തി. അതേസമയം രാജസ്ഥാനാകട്ടെ ജയത്തോടെ ആത്മമവിശ്വാസം തിരിച്ചുപിടിക്കാൻ വേണ്ടിയാണ് പഞ്ചാബിനെതിരെ ഇറങ്ങുന്നത്. രാജസ്ഥാൻ കളിച്ച മൂന്ന് മത്സരത്തിൽ ഒന്നിൽ മാത്രമേ അവർക്ക് ജയിക്കാൻ കഴിഞ്ഞിട്ടുള്ളു. ആദ്യ മത്സരത്തിൽ ഹൈദരാബാദിനോട് 44 റൺസിനായിരുന്നു രാജസ്ഥാൻ തോറ്റത്.

തുടർന്ന് രണ്ടാം മത്സരത്തിലും തോൽവി തന്നെയായിരുന്നു ഫലം. രണ്ടാം മത്സരത്തിൽ കൊൽക്കത്ത നൈറ്റ് റൈഡേഴ്‌സിനെതിരേ എട്ടു വിക്കറ്റിന്റെ തോൽവിയായിരുന്നു വഴങ്ങിയത്. പിന്നീട് ചെന്നൈക്കെതിരേ നടന്ന അവസാന മത്സരത്തിലായിരുന്നു രാജസ്ഥാൻ ആശ്വാസ ജയം നേടിയത്. ആറു റൺസിനായിരുന്നു രാജസ്ഥാൻ സീസണിലെ ആദ്യ ജയം നേടിയത്.

Fierce battles will be fought in IPL today Big names on the field