മലപ്പുറം: റിയാസ് മൗലവി വധക്കേസില്‍ ആര്‍.ആര്‍.എസ് പ്രവര്‍ത്തകരെ വെറുതെവിട്ട നടപടിയില്‍ ഗുരുതര ഒത്തുകളിയെന്ന് മുസ് ലിം ലീഗ് നേതാവ് പി.കെ കുഞ്ഞാലിക്കുട്ടി.  കേസില്‍ പ്രോസിക്യൂഷന് ഗുരുതര തകരാര്‍ സംഭവിച്ചെന്നും, സര്‍ക്കാര്‍ ലാഘവത്തോടെയാണ് കേസ് കൈകാര്യം ചെയ്തതെന്നും ഇത്തരം വീഴ്ച്ച ഉത്തരേന്ത്യയില്‍ പോലും സംഭവിക്കാത്തതാണെന്നും കുഞ്ഞാലിക്കുട്ടി പറഞ്ഞു. 

' എന്തായാലും ഇതിലൊരു ഒത്തുകളിയുണ്ട്. കേസില്‍ എങ്ങനെയാണ് പ്രോസിക്യൂഷനും, പ്രതികളും ഒത്തുകളിച്ചതെന്ന് നോക്കേണ്ടിയിരിക്കുന്നു. സാധാരണപോലെയുള്ളൊരു സംഭവമല്ലിത്. ഗുരുതരമായ എന്തോ ഒത്തുകളിയുണ്ട് എന്ന കാര്യം ഉറപ്പാണ്,' അദ്ദേഹം പറഞ്ഞു. മലപ്പുറത്ത് മാധ്യമങ്ങളോട് പ്രതികരിക്കുകയായിരുന്നു അദ്ദേഹം. 

നേരത്തെ റിയാസ് മൗലവി വധക്കേസില്‍ പ്രതികളെ വെറുതെവിട്ട കോടതി വിധി നിരാശാജനകമെന്ന് മുസ് ലിം ലീഗ് സംസ്ഥാന ജനറല്‍ സെക്രട്ടറി പി.എം.എ സലാമും പ്രതികരിച്ചിരുന്നു. യാതൊരു പ്രകോപനവുമില്ലാതെ പള്ളിയില്‍ ഉറങ്ങിക്കിടന്ന സാധുവായ മനുഷ്യനെ സംഘം ചേര്‍ന്ന് സംഘപരിവാര്‍ കാപാലികര്‍ കൊലപ്പെടുത്തി. കേസിന് ഈ ഗതി വരാനുള്ള കാരണം പൊലിസിനും പ്രോസിക്യൂഷനും സംഭവിച്ച വീഴ്ച്ചയാണെന്നും പി.എം.എ സലാം പറഞ്ഞിരുന്നു. 

കാസര്‍കോട് പഴയ ചൂരി മദ്‌റസയിലെ അധ്യാപകനായിരുന്ന കുടക് സ്വദേശി മുഹമ്മദ് റിയാസ് മൗലവി 2017 മാര്‍ച്ച് 20ന് പുലര്‍ച്ചെയാണ് കൊല്ലപ്പെട്ടത്. പള്ളിയ്ക്ക് അകത്തെ മുറിയില്‍ ഉറങ്ങുകയായിരുന്ന റിയാസ് മൗലവിയെ അതിക്രമിച്ചുകടന്ന് സംഘപരിവാര്‍ പ്രവര്‍ത്തകര്‍ കഴുത്തറത്ത് കൊലപ്പെടുത്തുകയായിരുന്നു. പ്രദേശത്ത് വര്‍ഗീയ സംഘര്‍ഷം ഉണ്ടാക്കുകയെന്ന ഗൂഢലക്ഷ്യത്തോടെയാണ് പ്രതികള്‍ കൊലപാതകം നടത്തിയതെന്ന് പൊലിസ് കോടതിയില്‍ സമര്‍പ്പിച്ച കുറ്റപത്രത്തില്‍ വ്യക്തമാക്കിയിരുന്നു. അജേഷ് എന്ന അപ്പു, നിതിന്‍കുമാര്‍, അഖിലേഷ് എന്ന സംഘ്പരിവാര്‍ പ്രവര്‍ത്തകരാണ് ഈ ക്രൂരകൃത്യം ചെയ്തതെന്ന് പൊലിസ് ഉടന്‍ കണ്ടെത്തി. സംഭവം നടന്ന് മൂന്ന് ദിവസത്തിനകം പ്രതികളെ അന്വേഷണ സംഘം അറസ്റ്റ് ചെയ്തിരുന്നു.

കണ്ണൂര്‍ ക്രൈംബ്രാഞ്ച് എസ്.പിയായിരുന്ന ഡോ. എ. ശ്രീനിവാസിന്റെ മേല്‍നോട്ടത്തില്‍ അന്നത്തെ ഇന്‍സ്‌പെക്ടര്‍ പി.കെ സുധാകരന്റെ നേതൃത്വത്തിലുള്ള പ്രത്യേക അന്വേഷണസംഘമാണ് കേസ് അന്വേഷിച്ചത്. 90 ദിവസത്തിനുള്ളില്‍ അന്വേഷണം പൂര്‍ത്തിയാക്കി കോടതിയില്‍ കുറ്റപത്രം സമര്‍പ്പിച്ചു. കേസിന്റെ വിചാരണവേളയില്‍ 97 സാക്ഷികളെ കോടതി വിസ്തരിച്ചിരുന്നു. 215 രേഖകളും 45 തൊണ്ടിമുതലുകളും കോടതിയില്‍ സമര്‍പ്പിച്ചിട്ടുണ്ട്. ഇതുവരെ ജാമ്യം ലഭിക്കാത്തതിനാല്‍ പ്രതികള്‍ ഏഴുവര്‍ഷക്കാലമായി ജയിലില്‍ തന്നെയാണ്.

ഇന്ന് രാവിലെയോടെ കാസര്‍ഗോഡ് ജില്ല പ്രിന്‍സിപ്പല്‍ സെഷന്‍സ് കോടതിയാണ് കേസില്‍ മൂന്ന് ആര്‍.എസ്.എസ് പ്രവര്‍ത്തകരെയും വെറുതെവിട്ട് വിധി പറഞ്ഞത്.