അഹമ്മദാബാദ്: ഐ.പി.എല്ലിൽ ഇന്ന് ഗുജറാത്ത് ടൈറ്റൻസും സഞ്ജു സാംസണിന്റെ രാജസ്ഥാൻ റോയൽസും നേർക്കുനേർ. താളം കണ്ടെത്തി കഴിഞ്ഞ രാജസ്ഥാനെയാണ് വിജയവഴിയിലുള്ള ഗുജറാത്ത് നേരിടേണ്ടത്. ഗുജറാത്തിന് നിലവിൽ ആറു പോയിന്റുകളുണ്ട്. രാജസ്ഥാന് നാലു പോയിന്റുകളാണ് ഉള്ളത്. ഗുജറാത്ത് നിരയിൽ രണ്ട് പോസിറ്റീവുകളാണ് ഉള്ളത്. മുഹമ്മദ് സിറാജാണ് ഗുജറാത്തിനെ മത്സരങ്ങൾ വിജയിപ്പിക്കുന്നത്. 9 വിക്കറ്റുകളാണ് താരം ഇതുവരെ വീഴ്ത്തിയത്. 

സായ് കിഷോറും ടീമിന് കരുത്താണ്. റാഷിദ് ഖാൻ, ഇഷാന്ത് ശർമ എന്നിവരുടെ മോശം ഫോമാണ് ടീമിന് ബാധ്യത. ടി20യിലെ മികവുറ്റ ബൗളറായ റാഷിദ് ഖാൻ ഇതുവരെ ഒരു വിക്കറ്റ് മാത്രമാണ് വീഴ്ത്തിയത്. പത്ത് റൺസ് നിരക്കിലാണ് താരത്തിന്റെ ഇക്കോണമിയുള്ളത്. ഇഷാന്തിന്റെ ഇക്കോണമി 12 ആണ്. റബാദ ടീമിൽ ഇല്ലാത്തതും കോട്‌സി പരുക്ക് കാരണം കളിക്കാത്തതുമാണ് ഗുജറാത്തിന്റെ മറ്റൊരു പ്രശ്‌നം. ശുഭ്മാൻ ഗിൽ, ജോസ് ബട്‌ലർ, റഥർഫോർഡ്, സായ് സുദർശൻ എന്നിവരുടെ ഫോം ഗുജറാത്തിനെ അപകടകാരികളാക്കുന്നു. വാഷിങ്ടൺ സുന്ദർ കൂടി എത്തിയതോടെ ടീം സന്തുലിതമായിരിക്കുകയാണ്. 

രാജസ്ഥാൻ പക്ഷേ തിരിച്ചുവരവിന്റെ പാതയിലാണ്. സഞ്ജു സാംസൺ, ധ്രുവ് ജുറൽ, റിയാൻ പരാഗ് എന്നിവർ മികവോടെ കളിക്കുന്നു. നിതീഷ് റാണയും ഫോമിലാണ്. ഫോമില്ലാതിരുന്ന യശസ്വി ജെയ്‌സ്വാൾ പഞ്ചാബ് കിങ്‌സിനെതിരേ മികച്ച ഇന്നിങ്‌സിലൂടെ തിരിച്ചുവന്നിട്ടുണ്ട്. ജെയ്‌സ്വാളിന്റെ ഫോം ടീമിന് നിർണായകമാണ്.

എന്നാൽ ബൗളിങ്ങിൽ സന്ദീപ് ശർമയല്ലാതെ ആരും മികവിലേക്ക് ഉയർന്നിട്ടില്ല. ജോഫ്ര ആർച്ചർ താളം കണ്ടെത്തിയതാണ് രാജസ്ഥാന് ആത്മവിശ്വാസം നൽകിയിരിക്കുന്നത്. രാജസ്ഥാന്റെ ബൗളിങ്ങും ഗുജറാത്തിന്റെ ബാറ്റിങ്ങും തമ്മിലുള്ള മത്സരമായിരിക്കും കാണാൻ പോവുന്നത്. ഗുജറാത്തിലെ അഹമ്മദാബാദിലെ സ്‌റ്റേഡിയത്തിലാണ് മത്സരം നടക്കുക.

Gujarat Titans and Sanju Samsons Rajasthan Royals face off today in the IPL