അഹമ്മദാബാദ്: ഐപിഎല്ലിൽ ഇന്ന് നടക്കുന്ന ആവേശകരമായ പോരാട്ടത്തിൽ രാജസ്ഥാൻ റോയൽസും ഗുജറാത്ത് ടൈറ്റൻസുമാണ് ഏറ്റുമുട്ടുന്നത്. ഗുജറാത്തിലെ അഹമ്മബാദ് സ്റ്റേഡിയത്തിൽ നടക്കുന്ന ഈ മത്സരത്തിൽ രാജസ്ഥാൻ നായകൻ സഞ്ജു സാംസണിന് ഒരു മികച്ച റെക്കോർഡ് കൈവരിക്കാൻ സാധിക്കും. എട്ട് സിക്‌സറുകൾ കൂടി നേടിയാൽ ടി-20യിൽ 350 സിക്‌സറുകൾ പൂർത്തിയാക്കാൻ സഞ്ജുവിന് സാധിക്കും. 342 സിക്സുകളാണ് സഞ്ജു ഇതുവരെ ടി-20യിൽ നേടിയിട്ടുള്ളത്.

മൂന്ന് ഇന്ത്യൻ താരങ്ങൾക്ക് മാത്രമേ കുട്ടിക്രിക്കറ്റിൽ 350 സിക്സുകൾ പൂർത്തിയാക്കാൻ സാധിച്ചിട്ടുള്ളൂ. രോഹിത് ശർമ്മ, വിരാട് കോഹ്‌ലി, സൂര്യകുമാർ യാദവ് എന്നിവരാണ് ഇതിനു മുമ്പ് ഈ നേട്ടം കൈവരിച്ചിട്ടുള്ളത്. ഗുജറാത്തിനെതിരെ മിന്നും പ്രകടനങ്ങൾ പുറത്തെടുക്കുകയാണെങ്കിൽ സഞ്ജുവിന് ഇന്ത്യൻ ടി-20 ചരിത്രത്തിലെ നാലാമനായി മാറാൻ സാധിക്കും. 

മത്സരത്തിൽ മറ്റൊരു റെക്കോർഡും സഞ്ജുവിനെ കാത്തിരിക്കുന്നുണ്ട്. മത്സരത്തിൽ 19 റൺസ് കൂടി നേടാൻ സാധിച്ചാൽ ടി-20 ഫോർമാറ്റിൽ 7500 റൺസ് പൂർത്തിയാക്കാൻ സാധിക്കും.രാജസ്ഥാന്റെ ആദ്യ മൂന്നു മത്സരങ്ങളിൽ ക്യാപ്റ്റനായി സഞ്ജു കളിച്ചിരുന്നില്ല. ഇമ്പാക്ട് പ്ലെയറായി മാത്രമായിരുന്നു സഞ്ജു കളത്തിലിറങ്ങിയിരുന്നത്. സഞ്ജുവിന്റെ അഭാവത്തിൽ റിയാൻ പരാഗ് ആയിരുന്നു രാജസ്ഥാനെ ആദ്യ മൂന്നു മത്സരങ്ങളിൽ നയിച്ചിരുന്നത്. എന്നാൽ ക്യാപ്റ്റനായി തിരിച്ചെത്തിയ ആദ്യ മത്സരത്തിൽ തന്നെ പഞ്ചാബിനെ വീഴ്ത്തി മികച്ച വിജയമാണ് രാജസ്ഥാൻ നേടിയത്.

സീസണിലെ ആദ്യ രണ്ടു മത്സരങ്ങളും പരാജയപ്പെട്ട രാജസ്ഥാൻ പിന്നീട് നടന്ന രണ്ടു മത്സരങ്ങളും വിജയിച്ചുകൊണ്ട് ടൂർണമെന്റിലേക്ക് ശക്തമായി തിരിച്ചുവരികയായിരുന്നു.സൺറൈസേഴ്സ് ഹൈദരാബാദിനോടും കൊൽക്കത്ത നൈറ്റ് റൈഡേഴ്സിനോടുമാണ് രാജസ്ഥാൻ പരാജയപ്പെട്ടിരുന്നത്. എന്നാൽ ആദ്യ മത്സരത്തിൽ പഞ്ചാബിനോട് പരാജയപ്പെട്ട ഗുജറാത്ത് പിന്നീടുള്ള മൂന്നു മത്സരങ്ങളും വിജയിക്കുകയായിരുന്നു. അതുകൊണ്ടുതന്നെ വിജയം തുടരാൻ തന്നെയായിരിക്കും ഇരുടീമുകളും ലക്ഷ്യം വെക്കുക. 

Sanju Samson need 8 six to complete 350 sixes in t20 format