ലണ്ടന്‍: ഒരു കുഞ്ഞിക്കാല് കാണാനായി എത്രയോ കാലമായി കാത്തിരിക്കുന്നു അവര്‍. നിരവധി ഡോക്ടര്‍മാരെ കണ്ടു. ചികിത്സകള്‍ ചെയ്തു. ഒന്നും ഫലം കണ്ടില്ല. അങ്ങിനെ നിരാശയുടെ പടുകുഴിയിലേക്ക് കൂപ്പു കുത്തുമ്പോഴാണ് അവരിലേക്ക് അവളുടെ ചേച്ചി ഒരു പ്രതീക്ഷയുടെ മാലാഖയായി പറന്നിറങ്ങുന്നത്. അസാധ്യമെന്ന് കരുതിയ പലതും സാധ്യമാക്കിയ ശാസ്ത്രം അങ്ങിനെ അവര്‍ക്ക് അവരുടെ മിറക്കിള്‍ ബേബിയെ സമ്മാനിച്ചു. യു.കെയില്‍ നിന്നുള്ള കഥയാണിത്. ഗ്രേസ് ഡേവിഡ്‌സണിന്റേയും സഹോദരിയുടേയും പരസ്പര സ്‌നേഹത്തിന്റെ അതുല്യമായ കഥ. 

പ്രവര്‍ത്തനരഹിതമായ ഗര്‍ഭപാത്രത്തോടെയാണ് ഗ്രേസ് ഡേവിഡ്‌സണ്‍ ജനിക്കുന്നത്. മേയര്‍-റോക്കിറ്റാന്‍സ്‌കി-കുസ്റ്റര്‍-ഹൗസര്‍ സിന്‍ഡ്രോം എന്നറിയപ്പെടുന്ന അപൂര്‍വ രോഗമാണിത്. വിവാഹം കഴിഞ്ഞ് 10 വര്‍ഷമത്തോളം പ്രതീക്ഷയോടെഗ്രേസും ഭര്‍ത്താവും പലതരം ചികിത്സകള്‍ നടത്തി. എന്നാല്‍ നിരാശയായിരുന്നു ഫലം. അനിയത്തിയുടെ സങ്കടം കണ്ട്  42 കാരിയായ ചേച്ചി എമി പര്‍ഡി അവരുടെ ഗര്‍ഭപാത്രം ദാനം ചെയ്യാനായി മുന്നോട്ട് വന്നു. ഇവര്‍ക്ക് 10 ഉം 6 ഉം വയസ്സുള്ള രണ്ട് പെണ്‍മക്കളുണ്ട്.

ഒടുവില്‍ യുകെയില്‍ ഗര്‍ഭപാത്രം മാറ്റിവയ്ക്കല്‍ ശസ്ത്രക്രിയ നടന്നു. യു.കെയില്‍ ഈ ശസ്ത്രക്രിയക്ക്  ആദ്യ സ്ത്രീയായി ഗ്രേസ് മാറി. 2023 ഫെബ്രുവരിയില്‍ ഓക്സ്ഫോര്‍ഡ് യൂണിവേഴ്സിറ്റി ഹോസ്പിറ്റല്‍സ് ഫൗണ്ടേഷന്റെ ഭാഗമായ ഓക്സ്ഫോര്‍ഡ് ട്രാന്‍സ്പ്ലാന്റ് സെന്ററില്‍ ഗര്‍ഭപാത്രം മാറ്റിവെക്കല്‍ ശസ്ത്രക്രിയ നടന്നത്. 30-ലധികം ഡോക്ടര്‍മാരുടെ ഒരു സംഘം ഏകദേശം 17 മണിക്കൂര്‍ എടുത്താണ് ആമിയുടെ ഗര്‍ഭപാത്രം നീക്കം ചെയ്ത് ഗ്രേസിലേക്ക് മാറ്റിവെച്ചത്. ബി.ബി.സി റിപ്പോര്‍ട്ടില്‍ പറയുന്നു. ശസ്ത്രക്രിയ നടന്ന് രണ്ട് വര്‍ഷത്തിന് ശേഷം അവരുടെ ജീവിതത്തിലേക്ക് ആ 'മിറക്കിള്‍' ബേബി വന്നു. അവര്‍ അവളെ എമി എന്നു വിളിച്ചു. അവളുണ്ടാവാന്‍ കാരണക്കാരിയായ ചേച്ചിയുടെ പേര്. 

25 വര്‍ഷത്തിലധികം നീണ്ട ഗവേഷണത്തിന്റെ പര്യവസാനമാണ് എമിയുടെ ജനനമെന്ന് യു.കെയിലെ കണ്‍സള്‍ട്ടന്റ് ഗൈനക്കോളജിക്കല്‍ സര്‍ജനായ പ്രൊഫസര്‍ റിച്ചാര്‍ഡ് സ്മിത്ത് പറയുന്നു. പലര്‍ക്കും പ്രതീക്ഷയാണ് ഈ വിജയമെന്നും അദ്ദേഹം കൂട്ടിച്ചേര്‍ക്കുന്നു. 

2014 ല്‍ സ്വീഡനിലായിരുന്നു ഗര്‍ഭപാത്രം മാറ്റിവയ്ക്കല്‍ ശസ്ത്രക്രിയയിലൂടെയുള്ള ആദ്യ കുഞ്ഞ് ജനിക്കുന്നത്. അതിനുശേഷം യുഎസ്, ചൈന, ഫ്രാന്‍സ്, ജര്‍മ്മനി, ഇന്ത്യ, തുര്‍ക്കി എന്നിവയുള്‍പ്പെടെ ഒരു ഡസനിലധികം രാജ്യങ്ങളിലായി ഏകദേശം 135 അത്തരം ഗര്‍ഭപാത്രം മാറ്റിവയ്ക്കല്‍ ശസ്ത്രക്രിയകള്‍ നടന്നിട്ടുണ്ട്.. ആരോഗ്യമുള്ള ഏകദേശം 65  കുഞ്ഞുങ്ങളും ശസ്ത്രക്രിയക്ക് പിന്നാലെ ജനിച്ചിട്ടുണ്ട്.

In a groundbreaking medical milestone, Grace Davidson from the UK became the first woman in the country to give birth following a uterus transplant from her sister.