വെറും പത്ത് മിനിറ്റില്‍ തയാറാക്കാവുന്ന സോഫ്റ്റ് ഉണ്ണിയപ്പം. ബേക്കിങ് സോഡയൊന്നും ചേര്‍ക്കാതെ തന്നെ നല്ല നാടന്‍ മൊരിഞ്ഞ ഉണ്ണിയപ്പം ഉണ്ടാക്കാവുന്നതാണ്. 

ചേരുവകള്‍

കുതിര്‍ത്ത അരി - രണ്ട് കപ്പ്
ശര്‍ക്കര- ഒരു കപ്പ്
ശര്‍ക്കര ഉരുക്കി അരച്ചെടുത്തത് 
പഴം-1 (പാളയന്‍കോടന്‍)
ഏലയ്ക്ക - 3
മൈദ- അര കപ്പ്



തേങ്ങാ കൊത്ത് - ആവശ്യത്തിന്
എള്ള്- ഒരു സ്പൂണ്‍
നെയ്യ് - ആവശ്യത്തിന്
വെളിച്ചെണ്ണ -ആവശ്യത്തിന്
ജീരകം - കാല്‍ ടീസ്പൂണ്‍
ഉപ്പ് - ആവശ്യത്തിന്

ഉണ്ടാക്കുന്ന വിധം

മിക്‌സിയുടെ ജാറില്‍ അരിയും പഴവും ശര്‍ക്കരപാനിയും ചേര്‍ത്തു നന്നായി അരച്ചെടുക്കുക. അതിലേക്കു മൈദയും ഉപ്പും ഏലയ്ക്കയും ചേര്‍ത്തു വീണ്ടും ഒന്നും കൂടെ അരെച്ചെടുത്ത് നാലോ അഞ്ചോ മണിക്കൂര്‍ ഒന്നു കുതിരാനായി മാറ്റി വയ്ക്കുക. 

ചുവട് കട്ടിയുള്ള പാന്‍ ചൂടാക്കി അതിലേക്കു നെയ്യ് ഒഴിച്ച് തേങ്ങ വറുത്തെടുക്കുക. അതിലേക്കു കുറച്ച് എള്ളും ജീരകവും കൂടെ ചേര്‍ത്ത് നെയ്യില്‍ വറുത്തിടുക. നേരെത്തെ തയ്യാറാക്കിയ മാവിലേക്കു ഇട്ടു കൊടുത്തു ഇത് നന്നായി ഇളക്കി കൊടുക്കുക. (ഉണ്ണിയപ്പത്തിന്റെ മാവ് ഇഡലി മാവിന്റെ പരുവത്തില്‍ ആയിരിക്കണം).

ഇനി ഉണ്ണിയപ്പം ചട്ടി അടുപ്പില്‍ വച്ച് ചൂടാകുമ്പോള്‍ അതിലേക്ക് എണ്ണ ഒഴിച്ച് ഓരോ കുഴിയിലും മാവ് ഒഴിച്ചു തിരിച്ചും മറിച്ചും ഇട്ടു വേവിക്കുക. അടിപൊളി സോഫ്റ്റ് ഉണ്ണിയപ്പം റെഡി. (നെയ്യില്‍ പൊരിച്ചെടുക്കുന്നതാണ് ഏറ്റവും ടേസ്റ്റ്.) അല്ലെങ്കില്‍ നെയ്യും വെളിച്ചെണ്ണയും കൂടെ മിക്‌സ് ചെയ്തും പൊരിച്ചെടുക്കാം).