അബൂദബി: അബൂദബിയില്‍ താമസകെട്ടിടത്തിന്റെ മൂന്നാം നിലയില്‍ നിന്ന് വീണ് മലയാളി വിദ്യാര്‍ഥിക്ക് ദാരുണാന്ത്യം. വ്യാഴാഴ്ച ഉച്ചയ്ക്കായിരുന്നു സംഭവം. എറണാകുളം തോട്ടറ സ്വദേശി ബിനോയ് തോമസിന്റെയും എല്‍സി ബിനോയുടെയും മകന്‍ അലക്‌സ് ബിനോയ് ആണ് മരിച്ചത്. 17 കാരനായ അലക്‌സ് അബൂദബി ഇന്ത്യന്‍ സ്‌കൂളിലെ വിദ്യാര്‍ഥിയായിരുന്നു. പ്ലസ് ടു പരീക്ഷാ ഫലം കാത്തിരിക്കവേയാണ് അലക്‌സിന്റെ മരണം. 

ടൂറിസ്റ്റ് ക്ലബ് ഏരിയയിലെ താമസകെട്ടിടത്തില്‍ നിന്ന് വീണ് ഗുരുതരമായി പരുക്കേറ്റ അലക്‌സിനെ ഉടന്‍ തന്നെ അബൂദബിയിലെ ശൈഖ് ഖലീഫ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. മകന് സംഭവിച്ച ദുരന്തം മാതാപിതാക്കള്‍ ആദ്യം അറിഞ്ഞിരുന്നില്ല, കെട്ടിടത്തിലെ വാച്ച്മാന്‍ വിളിച്ചുപറഞ്ഞാണ് ബിനോയ് തോമസ് വിവരം അറിഞ്ഞത്. അലക്‌സിന്റെ മാതാവ് എല്‍സി ബിനോയ് അബൂദബിയിലെ ഒരു ആശുപത്രിയില്‍ നഴ്‌സായി ജോലി ചെയ്യുകയാണ്. സഹോദരങ്ങള്‍: ഡോ. രാഹുല്‍ ബിനോയ്, രോഹിത് ബിനോയ്.

മൃതദേഹം നാട്ടിലേക്ക് കൊണ്ടുവരുന്നതിനുള്ള നടപടികള്‍ പുരോഗമിക്കുകയാണെന്ന് കുടുംബാംഗങ്ങള്‍ അറിയിച്ചു. സംസ്‌കാരം ഞായറാഴ്ച വൈകുന്നേരം 3.30 ന് സെന്റ് മേരീസ് ക്‌നാനായ കത്തോലിക്ക ചര്‍ച്ച് തോട്ടറയില്‍ നടത്തും.

A 17-year-old Malayali student, Alex Binoy, tragically died after falling from a residential building in Abu Dhabi. The Plus Two student, who was awaiting exam results, succumbed to his injuries at Sheikh Khalifa Hospital. The funeral will be held in his hometown, Thottara, Ernakulam. The incident has left the Indian expat community in shock.